Prencipia una nueva edición d’o programa ‘Luzía Dueso’

Iste curso se beneficiarán d'el meyo milar d'alumnos d'a provincia de Uesca que estudean en centros en os quals se cursa aragonés.

Cartel anunciador d'a edición d'iste curso (Foto: Gubierno d'Aragón)

A VI edición d’o programa d’animación cultural en aragonés “Luzía Dueso” prencipia iste luns, 20 de febrero. Se tracta d’un prochecto d’a Dirección Cheneral de Politica Educativa y Educación Permanent d’o Gubierno d’Aragón que se mira d’empentar y dignificar l’aprendizache y emplego de l’aragonés y d’as suyas modalidatz lingüisticas.

Iste curso se beneficiarán d’el meyo milar d’alumnos d’a provincia de Uesca que estudean en centros en os quals se cursa aragonés. Se tracta de 400 alumnos de colechios d’Educación Infantil y Primaria y d’amán d’un centenar d’os centros d’Educación d’Adultos d’as comarcas d’a Chacetania, Alto Galligo, Sobrarbe y a Ribagorza.

O programa consta d’a-saber-las actividatz didacticas y ludicas en as quals se fa servir l’aragonés como luenga vehiclar y con as quals os alumnos podrán treballar diferents arias curriculars. Asinas s’ofierta a os centros tallers de literatura, matematicas, conoixencia d’o meyo u nuevas tecnolochías. Tamién mosica, representacions teatrals y procheccions.

Iste anyo se pretende visualizar as diferents modalidatz lingüisticas de l’aragonés y favoreixer a participación de personas d’o mundo d’a cultura y d’a sciencia que fan servir as distintas variedatz ta que transmitan a suya experiencia. Asinas, como novedat, se desembolicará a charrada  “Güe semos con…”, se prochectará o cortometraxe en ribagorzano “Cosetas d’aentro” y se desembolicará un taller de falordias en ansotano.

As primeras actividatz se desembolicarán iste luns en o CRA Cinca Cinqueta, concretament en Chistén y Saraviello, y en o CEIP Asunción Pañart de L’Aínsa con o taller “Fendo zenzias naturals”. O martes, día 21, l’aula de Biescas d’o CRA Alto Galligo acullirá l’actividat “Bailes tradizionals aragoneses”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.