Prencipia una vaga indefinida en Prefabricaus Selgua

A interpresa debe una media de 8000 euros a cada treballador

Planta d'a interpresa (Foto: Praínsa)

Planta d’a interpresa (Foto: Praínsa)

Os treballadors de Prefabricaus Selgua, interpresa que perteneix a la transnacional Grupo Praínsa, han prencipiau iste lunes una vaga indefinida en no haber recibiu o pago de denguna d’as nominas que a interpresa les debe. En total, encara les manca de cobrar a extra d’o mes d’abiento y as nominas d’os seis meses de 2013, lo que fa una media de 8.500 euros.

A interpresa, que tien a suya siede en o poligono industrial L’Armentera de Monzón, fabrica traviesas t’o ferrocarril. O suyo principal client, ADIF (Administrador d’Infraestructuras Ferroviarias), tien una important deuda con Praínsa, seguntes informan fuents sindicals, qui adhiben que “de treballo, no’n manca”.

O conflicto prebó de solucionar-se con a intervención d’o Servicio Aragonés de Mediación y Arbitrache, qui consiguió a promesa de que a interpresa pagaría dos d’as nominas iste lunes. En no fer-se realidat iste pago, 13 d’os 18 treballadors prencipioron as protestas y a vaga, que continará dica que veigan bell cenyo de man d’a interpresa.

A situación ye parellana a la que son vivindo os treballadors de Prefabricaus Monzón, qui han feito qualques vagas y son agora mesmo en proceso de ERE, y que son pendients tamién de cobrar quantas nominas.

A ran politico, tanto CHA como IU han presentau bellas preguntas y iniciativas en o concello de Monzón y en os parlamentos espanyol y aragonés ta que se trobe bella solución ta iste conflicto.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.