Prencipian as negociacions entre SARGA y sindicatos

En a reunión, nomás s'ha fixau o calendario de negociacions y s'ha dau bella información t'os sindicatos

 

Modesto Lobón presentando a propuesta de SARGA (Foto: D.Ch.A.)

Modesto Lobón presentando a propuesta de SARGA (Foto: D.Ch.A.)

Iste miercols s’ha feito a primer reunión entre a Dirección de SARGA (Sociedat Aragones de Chestión Agroambiental) y os sindicatos representaus en o Comité d’interpresa ta mirar de plegar en bell alcuerdo que faiga achiquir o deficit de más de cinco millons d’euros que tien a interpresa. Ista, que ye resultau d’a fusión de dos interpresas publicas, SODEMASA y SIRASA, tien una plantilla de treballadors de quasi 1.500 personas entre as que i son bellas 800 personas que treballan en a luita contra os incendios mientres o estiu.

 

Modesto Lobón, conseller de Agricultura, Ganadería y Meyo Ambient y de vez president d’o Consello d’Administración de SARGA, presentó fa bells diyas belunas d’as propuestas d’a interpresa. Ta cabidar ixos cinco millons se proposaba una retallada de 127 puestos de treballo u d’o 16,2% d’o chornal ta totz os treballadors. Se i planteyan tamién atras midas como enamplar a carga de treballo u achiquir bells gastos, y prou que bell mezclallo de todas ellas.

A reunión de hue ye estada nomás que un primer contacto. A interpresa ha dau bells datos t’os sindicatos, que istos heban demandau d’antis, como os datos economicos detallaus, edatz d’os treballadors u menas d’achustes y s’ha fixau un calendario de reunions que se ferán alto u baixo dos vegadas a la semana dica o 31 de chinero, calendata que se mete como muga ta plegar en bell alcuerdo.

Seguntes o gubierno, a reunión ha teniu “muito buen ambient” y han anunciau que entregarán más documentación t’os sindicatos en a reunión que se ferá iste mesmo viernes. Dende fuents sindicals, no fan garra valuración por agora y estudiarán los datos ta trobar “a solución menos traumatica t’os treballadors.”

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.