Prencipian as XXI Chornadas d’as luengas d’Aragón

L'Asociación Cultural Nogara-Religada organiza por XXI anyada istas chornadas plenas d'actos sobre l'aragonés y o catalán

cartelIste Lunes prencipian en Zaragoza a XXI edición d’as Chornadas d’as luengas d’Aragón que organiza todas las anyadas l’Asociación Cultural Nogara-Religada. Como todas las anyadas, mientres toda una semana, se charrará y debatirá sobre as luengas d’Aragón, a suya historia, actualidat y futuro.

As chornadas prencipiarán con a charrada de l’historiador Guillermo Tomás Faci, qui charrará sobre “Os Fueros d’Aragón: introducción, importancia pa la historia de l’aragonés y bellas novedatz”, tema de prou actualidat dimpués d’o debat ubierto por o trobo d’o manuscrito más viello conoixiu con parte d’os Fueros d’Aragón.

O mierques continarán as chornadas con una visita guidada en aragonés por o centro d’a ciudat. Dende o centro Joaquín Roncal, en a carrera Sant Braulio, se ferá una gambada que rematará amán d’o Teatro d’o Mercau. Astí se asistirá a l’homenache poetico a Desideri Lombarte d’o Dúo Recapte. Iste ye d’un d’os actos que se incluyen en as celebracions d’o 25 cabo d’anyo d’a muerte d’o poeta de Penyarroya de Tastavins.

Os estudios sobre a luenga siempre ocupan una parte important d’as chornadas. En ista edición, l’aragonés d’o lugar de Campo, será o protagonista en a charrada d’o chueves: “Una ferramienta mes pa o conoiximiento de l’aragonés ribagorzano: O “Vocabulario del habla de Campo” de Bienvenido Mascaray”, a on que se podrá conoixer o treballo publicau por Xordica Editorial.

A zaguer d’as charradas plega o viernes de man de Javier Vispe Mur, qui explicará o premiau y reconoixiu prochecto que se ye desembolicando en o CRA Cinca Cinqueta. A charrada, titolada “El Cine de La Clica d’el Cinca-Cinqueta: El medio audiovisual como recurso ta’l aprendizache y revalura de l’aragonés en educación primaria”, amanará os videos feito con os ninos d’o CRA, de tot en aragonés y que tantismo exito son tenendo aintro y difuera d’Aragón.

As chornadas rematarán o sabado con un socalce en l’Espacio Treziclo, en a carrera Linyán de Zaragoza. Toda la resta d’actividatz se ferán en o Centro Joaquín Roncal, en a carrera Sant Braulio y tienen entrada de baldes, fueras de l’homenache a Desideri Lombarte.
Javier Vispe Mur de Clica Cinca-Cinqueta

Una rispuesta a Prencipian as XXI Chornadas d’as luengas d’Aragón

  1. Pingback: Prencipian as XXI Chornadas d’as luengas d’Aragón » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.