Prencipian os Chuegos Olimpicos mas blindaus d’a historia

I hai misils en bellas terrazas de Londra

Os Chuegos Olimpicos de Londra empecipiarán oficialment hue a las diez d’a nueit, hora nuestra. Tot y que o miercols ya empecipioron bellas competicions, como as de futbol femenino y masculino, hue se ferá a ceremonia inaugural. Podríanos dicir que a capital d’o Reino Uniu ye a ciudat mas olimpica de todas: ye a tercer vegada que se disputan uns Chuegos. Y o caso ye que, quan o 6 de chulio de 2005, se sabió que Londra tornaría a estar a siede d’os Chuegos, dengún no lo pensaba. Amás, a l’atro’l diya, un atentau terrorista fació esclatar quatro bombas en quatro puntos d’o ret de transporte publico. Be d’estar por ixo que a seguranza d’os chuegos ye dende fa semanas en boca de totz. I hai una cierta psicosi sobre un posible atentau y s’han preso midas tan poco habituals como a legalización de chuicios exprés u a colocación de misils tierra-aire en prous terrazas d’a ciudat.

Entre policía, exercito, seguranza privada y voluntarios, mas de vinticinco mil individuos treballarán por a seguranza de ciudadanos y visitants. Londra s’ha blindau con un gran despliegue de maquinaria belica aeria, terrestre, fluvial y marina. Tot ixo costará, seguntes presupuesto, mas de 650 millons d’euros.

A primer vegada que Londra organizó uns Chuegos Olimpicos estió en 1908, en o vico de White City; a segunda estió en Wembley en 1948; y agora, en Stratford, en l’este d’a ciudat. Stratford yera dica agora un d’os vicos pobres d’a ciudat, pero i hai qui no apreba o cambeo que ha feito.

Danny Boyle, director de cine y creyador artistico, ye l’encargau d’o espectaclo inaugural de hue a l’atardeixer. Boyle, que dirichió ‘Trainspotting’ y ganó un Oscar con ‘Slumdog Millionaire’, ha explicau que o espectaclo tendría un aire fílmico.

Enlaces ta seguir os Chuegos

Os meyos de comunicación britanicos informan en detal de toda cosa relacionada con os Chuegos. A BBC ofreixe una guida d’as actividatz previstas dica o 12 d’agosto. Mesmo tien una pachina adedicada a o recorriu de l’antorcha olimpica.

O diario The Guardian tamién fa un seguimiento exhaustivo y mesmo fa gambadas virtualment por o parque olimpico de dos trazas diferents.

Y dende ista pachina web d’Eurovision se podrán seguir en directo todas as competicions.

Os Chuegos tamién tienen un programa cultural extenso, a la marguin d’as competicions esportivas.

Representación aragonesa

A representación aragonesa en ista edición d’os Chuegos Olimpicos ye formada por Isabel Macías y Mª José Poves en atletismo, Andrea Blas en waterpolo y Pablo Abián en badminton. Tamién i serán atros tres aragoneses: Jorge Cardona, Teresa Perales y Javier Hernández, en l’equipo paralimpico.

Fuent: http://www.vilaweb.cat/noticia/4030823/20120727/comencen-jocs-olimpics-blindats-historia.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.