Preocupación en Fraga por os cans albandonaus

IU levará una iniciativa t'o concello t'apanyar o problema. En os zaguers meses ha puyau o numer de cans albandonaus dondiando por a ciudat

Bells cochos albandonaus en a ciudat

Bells cochos albandonaus en a ciudat (Foto: IU)

Izquierda Unida (IU) en Fraga ha quiesto levar t’o Concello d’a ciudat a suya preocupación cuanto a la puyada en l’albandono de cans en a via publica, que dengún se’n fa cargo y que, dende fa bells meses, dondían por as carreras d’o casco urbano“. O coordinador d’a formación en Fraga, Xandru Sánchez, diz que “bells vecins, beluns propietarios d’animals de companyia, alertan de que os animals albandonaus, antimás d’os periglos que pueden causar t’as personas y vehiclos, son un foco de parasitos y malotías t’os cans”.

“L’actual ordenanza municipal de convivencia ciudadana d’o Concello de Fraga obliga a los amos, entre atras cosas, a levar os cans ataus con correya en a via publica, y a replegar os excrementos feitos por istos, pero no regulan as obligacions y actuacions cuanto a los animals deixaus a la bimbola en zona urbana”, explica Sánchez. “Asinas – contina – a canera municipal de Uesca se fa cargo d’os cochos albandonaus en o termino municipal de Fraga pero, bellas vegadas, dicen que bi ha sobrepoblación canina y no pueden fer-se cargo d’os animals, qui continan dondiando por as carreras.”

Debant d’isto, l’Asambleya Local de IU en Fraga ye treballando en fer una propuesta ta enamplar as actuals ordenanzas municipals de convivencia ciudadana t’adaptar-las a iste problema. Entre as midas, IU proposa regular a figura de l’achent civico t’aduyar a propietarios de cans, fer un rechistro municipal de población de cochos, y meter en marcha campanyas de concienciación ciudadana sobre o rispeto y cudiau d’os animals de companyía.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.