Preocupación por a inestabilidat de l’entibo de Yesa y a puyada d’os costes

Os movimientos d'as laderas de l'entibo fan inquietar-se a la población y puyar más os costes d'a obra de recreiximiento

Imachen d'as obras (Foto: Asociación Río Aragón)

Imachen d’as obras (Foto: Asociación Río Aragón)

Os zaguers datos conoixius de man d’a Confederación Hidrografica de l’Ebro cuanto a la estabilidat d’as laderas de l’entibo de Yesa, han provocau a preocupación de vecins d’a redolada y de asociacions y organizacions contrarias a lo recreiximiento d’iste polemico entibo. A plevia d’os zaguers diyas, que a CHE califica de “intensa” ye a causa, seguntes iste organismo d’os zaguers movimientos en a ladera dreita de l’entibo.

Istos movimientos se vienen detectando, y denunciando, dende fa tiempo y as zaguers anyadas muitas brecas de grandaria considerable i han apareixiu alarmando a las poblacions d’a redolada. Antimás, y como  remeran dende Chunta Aragonesista, ista situación ha feito puyar os presupuestos d’o recreiximiento, en haber-se de fer nuevas obras ta estabilizar as laderas. Istos nuevos movimientos tornarán a puyar o presupuesto, seguntes CHA. A mesma CHE reconoix en nota de prensa que “o coste final d’a obra penderá d’a evolución d’os treballos”. O presupuesto prencipió con 113 millons d’euros en 2001 y en os presupuestos chenerals de l’estau de 2013 ya pasan los 350 millons.

L’Asociación Río Aragón alerta tamién d’o periglo t’os habitadors d’a redolada que tienen istos movimientos de laderas. Acusan a la CHE de querer “trasmitir un mensache de normalidat y de que tot ye controlau, pero cosa bi ha más aluenyau d’a realidat.” “Grau ye a cosa quan dan l’alarma preventiva y avisan a los Gubiernos d’Aragón, Navarra y o concello de Yesa, feito inaudito en as suyas trazas d’actuar”, adhiben. Tamién preguntan a la CHE si “puet asegurar que istos episodios “lentos” u d’una magnitut relativa, no puedan esdevenir bell diya en rapedos y de magnitut considerable”. Dende l’asociación son seguros de que a CHE no puet guaranciar-lo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.