Presentación d’o libro ‘Indumentaria tradicional aragonesa’ en Alcanyiz

O salón de Plenos d'a Comarca d'o Baixo Aragón acullirá o proximo martes a presentación d'un libro sobre indumentarias y vestimentas

Portalada d'o libro 'Indumentaria tradicional aragonesa'. (Foto: PRAMES)

O martes 21 de febrero se presentará a las 19:30 horas en a siede d’a Comarca d’o Baixo Aragón o libro que leva por titol “Indumentaria tradicional aragonesa”, obra coordinada por Elena Guarc y Dabí Latas.

Os autors movius por a inquietut de conoixer os usos d’o vestir tradicional d’os lugars d’o Baixo Aragón y Matarranya publicoron o libro “Indumentaria tradicional en el Bajo Aragón y Matarraña…. Y las demás ropas de uso y llevar”.

Fruito d’o resultau d’anyos d’investigación a traviés d’o estudeo de documentación historica, de pinturas y gravaus, de libros de viachers, de postals costumbristas, de fotografías viellas, amás d’haber levau a cabo una extensa labor de campo por os distintos lugars an se catalogoron prendas antigas conservadas en domicilios particulars surte a obra “Indumentaria tradicional aragonesa” en o conteniu d’a qual podemos trobar articlos d’indumentaristas de prestichio que nos ofreixen una visión global sobre o vestir tradicional que existió en Aragón dende finals d’o sieglo XVIII dica primers d’o sieglo XX.

O libro amuestra a diversidat de teixius, a riqueza y variedat de cadaguna d’as prendas y s’estructura en diferents apartaus entre os quals podemos trobar un amanamiento a o estudeo d’a indumentaria tradicional (protocolos notarials, etnotextos, os museus…), a importancia d’a indumentaria en o folklore, un apartau especifico t’os traxes d’Echo y Ansó, a indumentaria en os ninos, as alfayas, o luto y a moda de transición.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.