Presupuesto retallau ta o 2012 en más d’un 2,6%

O presupuesto ye similar a lo presentau en 2007, d'arredol de 5500 millons d'euros

 O Presupuesto d’Aragón ta 2012, o mas austero dende 2007 y con claros prencipios de contención y d’eficiencia por un costau, y de reyalismo por unatro, seguntes o gubierno, ye pensau en adaptar a la reyalidat economica as previsiones d’ingresos y as partidas infradotadas y baixará un 2,65% respective a o de 2011.

Ixos son os prencipals mensaches que ha lanzau iste martes o consellero de Ficienda, Mario Garcés, en a presentación publica d’o prochecto de lei de Presupuestos d’Aragón ta 2012, que puya dica 5.328,7 millons d’euros, que quedan en 5.065,8 si nomás se para cuenta os gastos no adedicaus a amortizar a deuda.

Seguntes o gubierno, iste presupuesto prioriza sobre tot as politicas publicas consideradas esencials: sanidat, educación, servicios socials, chusticia y emplego, con una dotación de 3.384,5 millons d’euros (un 0,46% mas) y un peso especifico de practicament o 70% sobre o total d’as previsions.

Asinas, se fa puyar en cient millons d’euros o gasto corrient d’o Departamento de Sanidat, ta asumir partida de farmacia intrahospitalaria; as prestacions destinadas a la Dependencia puyan 22 millons dica os 120; l’Ingreso Aragonés d’Inserción se dota con 13,5 millons mas dica os 20, y os gastos de presonal de Chusticia puyan tres millons d’euros.

Tamién puya o presupuesto que s’adedica a obras y inversions en hespitals y centros de salut en un 3,6 % dica 24,6 millons y as politicas activas d’emplego tienen un important empento con una puyada d’o 3,14% en o presupuesto de l’INAEM.

Totas istas puyadas fan que a resta de capitols, que o gubierno considera no esencials, baixen.

L’aria d’infrastructuras y meyo ambient caye un 8,69% (un 28% en concreto a de Meyo Ambient); as actuacions de caracter cheneral baixan un 10,42% (un 18,7% a Televisión y a Radio Autonomicas); un 6,22% baixan as politicas economicas (sobre tot Turismo, un 33%, y Industria y Enerchía, un 23%), mientres que l’aria de gastos comunas puya un 49,55 % dica os 191,5 millons d’euros.

Isto ye a causa que se dota con 20 millons a un Fondo de Continchencia d’Execución Presupuestaria destinau exclusivament a financiar modificacions que puedan plegar entre l’exercicio y que tiene como obchectivo retener as pulsions de puyar d’os departamentos. No i habrá mas ampliación de credito que istes 20 millons, ha advertiu Garcés.

Garcés ha explicau que no i hai habiu unatra opción que conchelar o chornal d’os emplegaus publicos debant d’a decisión d’o Gubierno espanyol de no publicar o decreto en que se fixa a masa salarial de totz os funcionarios de l’estau.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.