Profanau o cementerio d’o lugar albandonau de Suelves

A lapida ye crebada y as despullas estendilladas en o sulero, encara que mancan bellas partis como os cranios

O nicho profanau (Foto: Chesús L. Domper)

O nicho profanau (Foto: Chesús L. Domper)

O lugal albandonau de Suelves, en o Sobrarbe, ha siu o scenario d’a profanación d’o suyo cementerio en os zaguers diyas d’aviento. Chesús L. Domper yera fendo una gambadeta por o lugar quan trobó que o cementerio, que en parti ye escoscau, con fuesas y nichos acotraciadas y flors, heba sufriu a dentrada de bella chent que heba estricallau bell nicho y mesmo s’heba levau as despullas de bells d’os suyos habitants enterraus en o puesto.

O cementerio de Suelves (Foto: Chesús L. Domper)

O cementerio de Suelves (Foto: Chesús L. Domper)

Suelves ye un lugar albandonau en os anyos 60, como tantos atros d’o país, y que mientres un tiempo, tenió bellas ufiertas por parti de forans ta fer bell centro recreatiu u mesmo repoblar o lugar. Seguntes Domper, que feba una gambada por a zona, “se veye que chent si que ha puyau a remerar os suyos muertos, porque bi’n ha fuesas acotraciadas”, pero dimpués d’ixo, que puestar estió ta la Nueit d’animas, o cementerio ha habiu de tener atros vesitants. En iste caso, seguntes as fotos, bells nichos han estau estricallaus ta estendillar o conteniu, despullas humanas d’habitants d’o lugar. Y mesmo, diz Domper, “mancan bellas partis d’os escletos, como lo cranio”.

En tot caso, y a esferencia d’o que ha pasau en atras profanacions, en o cementerio no bi’n ha garra sinyal u pintada que premita saber qui ha puesto fer ista esferra en o cementerio que alza a os habitants de Suelves.

L’albandono d’istos lugars fa dificil saber si han habiu atras esferras feitas en iste, y atros lugars, y mesmo de no ser por a gambada que fació Chesús L. Domper, a profanación hese pasau desapercibida, porque en os lugars albandonaus as vesitas d’os antigos habitants gosan coincidir con diyas como l’1 de noviembre, u a celebración de trobadas en os diyas que yera la fiesta d’o lugar, como pasa en atros lugars.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.