Profesionals d’a cultura demandan a dimisión de Vadillo

Se publica un manifiesto contra o nombramiento de Humbero Vadillo

Profesionals d’a cultura han demandau en un manifiesto a dimisión d’o director cheneral de cultura, Humberto Vadillo, por os suyos escritos y declaracions que consideran una faltada ent’a cultura feita en Aragón.

Qui han sinyau iste manifiesto treballan en todas as dembas d’a cultura: escritors, scientificos, profesors d’a universidat y de l’amostranza meya, abogaus, fotografos, reyalizadors de cine, poetas, historiadors, mosicos, filosofos, librers, y asinas asinas, con nombres muito conoixius como Emilio Gastón, Joaquín Carbonell, Ángel Guinda, Patricia Almárcegui, Anchel Conte, Antonio Altarriba, Antonio Postigo, Vicente Calatayud, Pedro Arrojo, Julián Casanova, Jose Luis Corral u Margarita Barbáchano. En un conoixiu rete social s’han sumau ta ista iniciativa más de mil personas dende o nombramiento de  Humberto Vadillo en una colla clamada “Vadillo dimisión“.

O manifiesto diz de Vadillo que “en poco tiempo ha destacau por a suya hostilidat enta os representants d’a cultura, a qui clama, despectivament, titiriters, y enta as luengas d’Aragón, y ha esfendiu con argumentos sin mica de lochica a no intervención publica u de l’estau en os prochectos culturals”. As parolas que publicó o director cheneral en o suyo blog, que zarró quan aceptó o cargo, y en atros meyos dichitals, han causau “refús y malestar por l’actitut contrimostrada enta os creyadors y a suya esfensa a tot estrus d’un modelo de cultura sin intervención de l’estau”, seguntes o manifiesto. Os sinyadors d’o manifiesto se preguntan tamién porque Vadillo ha aceptau o cargo a tamás d’estar tan en contra d’a intervención publica en a cltura.

Dende o suyo nombramiento, o nuevo director cheneral ya heba chenerau arrienda criticas dende sector politicos. Tamién causó a dimisión de Pilar Navarrete, directora d’a Biblioteca d’Aragón, en sentir-se incapable de treballar de conchunta con ell. Dolores Serrat, Consellera de Eduación, Universidat, Cultura y Esporte, declaró en agosto que Vadillo teneba “muita capacidat de treballo” y que “podeba alportar muito a Aragón”, amostrando asinas o suyo refirme a lo director cheneral debant d’as criticas que se sentiban alavez.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.