Protesta en A Penya contra a perda de paradas d’o canfranero

Una nueva concentración en a estación d'A Penya ha arroclau a unas 100 personas que quieren que o canfranero contine aturando en todas as paradas

Tren en Canfranc. Foto: Pablo Abad (CC-BY)

Tren en Canfranc. Foto: Pablo Abad (CC-BY)

O sabado pasau se celebró una concentración en A Penya en contra d’a eliminación d’as paradas d’a linia de tren Zaragoza-Canfranc en bell trachecto d’a linia. A concentración yera prevista a las 17:30 h. y contó con a presencia d’unas 100 personas.

As paradas suprimidas son as d’A Penya, Candarenas y Anzanigo y son emplegadas por mas personas de lugars vecins, que amás, no disponen de servicio complementario d’autobús, o que fa muit dificil o desplazamiento d’os vecins d’as localidatz y mesmo les dificulta de poder fer una vida normal en tener dificultatz en ir t’o medico u fer compras.

Os concentraus y concentradas que portaban pancartas con lemas contra os retalles y en defensa d’o ferrocarril publico, facioron aturar o tren que puyaba enta Samianigo mientres bells minutos. A concentración yera refirmada por organizacions como CREFCO, a Plataforma por o Desembolique d’o Ferrocarril Publico en Aragón u Ecolochistas en Acción.

As personas afectadas comentan que o tiempo de viache d’o tren en que s’han eliminau istas paradas ye de 3 h. y 46 minutos, nomás quatro minutos menos que o tren que sí las tiene, estando amás iste tren sin istas paradas o que menos ocupación tiene, por o que consideran inchustificadas istas midas y temen por a supresión d’a linia.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.