Protesta y acampada indefinida de profesors en Zaragoza

Convocaus por "Marea Verde", os docents han protestau por as retalladas educativas y a reducción de personal interino. A la fin, han decidiu d'acampar indefinidament

Lectura d’o comunicau

Una nueva cita reivindicativa teneban profesors y profesoras aragonesas debant d’a consellería d’educación en Zaragoza en protesta por as retalladas en educación que menazan con deixar sin treballo a uns 2.000 profesors y profesoras interinas l’anyada venient, arredol de dos tercios d’a plantilla d’interinos actual, asinas como profesors que habrán de desplazar-se de centro por quedar-se sin a suya plaza.

Convocaus por “Marea Verde“, s’ha prencipiau con una concentración debant d’a consellería a on s’han chuntau unas 500 personas. O soniu mas sentiu en ixos momentos yeran os chiflos. I heba tanto profesors de Zaragoza, como tamién de centros rurals, demandando futuro t’as redoladas, pues as retalladas deixan os servicios educativos rurals en una situación muit dificil, afectando muit negativement a las familias d’os lugars, que han de fer un esfuerzo extra.

Acampada indefinida contra as retalladas en educación

Una vegada leyiu o comunicau, a marcha ha continuau ent’a delegación provincial de Zaragoza, situada a bells metros d’a consellería. S’ha scenificau un enterreco d’a educación que ha teniu o suyo punto central debant d’a citada delegación provincial a on s’heba desplagau, como asinas heba estau en a consellería, un fuerte dispositivo policial bloqueyando a dentrada. S’ha tornau a demandar a derogación d’o Reyal Decreto 14/2012 a on se replegan as retalladas.

Tanimientres, en uns chicotz chardins entre a carrera Samianigo y as avenidas Gómez Laguna y Juan Pablo II acampaban de forma indefinida profesors y profesoras. No s’ha produciu garra incident ni identificacions y a policía ha iu marchando china-chana d’a zona. Os docents ferán actividatz en a zona d’acampada, como uns tallers a las 18 h. d’ista tardi y una primera asamblea a las 20 h. de huei.

Salida ent’a delegación provincial

 

 

 

 

 

 

 

 

“Enterreco” d’a educación en a delegación provincial

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.