Protestas en Grecia por a muerte d’un rapero a mans d’un faixista

Un choven estió asesinau iste martes por un simpatizant d'o partiu nazi Amaneixer Dorau. A l'arreu se convocan manifestacions antifaixistas en tot Grecia

Imachen d'una d'as manifestacions (Foto: LaHaine)

Imachen d’una d’as manifestacions (Foto: LaHaine)

As reaccions ta l’asesinato iste martes de Pavlos Fyssas, un conoixiu rapero antifaixista griego, a mans d’un simpatizant d’o partiu faixista Amaneixar Dorau, no han tardau guaire. Os griegos han saliu t’a carrera ta protestar por ista muerte y por toda la violencia que son protagonizando dende fa muitos meses os miembros d’ixe partiu.

Pavlos estió asesinau en a maitinada d’iste martes quan una colla de nazis lo rodioron y un d’ells le clavó dos vegadas un cutiello en l’estamaco y o peito. A tamás d’estar-ie present a policía, ista no intervinió dica la punyalada y con a más gran parti d’os faixistas ya fuyius, seguntes os testigos. Ista vegada ha rematau con una muerte, pero a violencia d’as collas neonazis vincladas a Amaneixer Dorau, suma arrienda denuncias por batans a inmigrants y personas vincladas a la cucha politica, como os ueito militants d’o Partiu Comunista Griego que estioron abataniaus fa bells pocos diyas.

Mientres o miercols as protestas ha iu creixendo en tot Grecia, habendo-ie disturbios en muitas d’as ciudatz. Más de trenta manifestants son estaus detenius y a policía ha feito servir mesmo gas glarimocheno. Tamién ha protechiu a bells militants y siedes de Amaneixer Dorau debant d’os manifestants. En a resta d’Europa tamién s’han convocau manifestacions de refirme a la familia d’o rapero y contra o faixismo, como ye o caso de Zaragoza, a on que se celebrará a las 20:00 d’iste viernes en a Plaza Espanya.

Dende lo gubierno griego se ha condenau a muerte de Pavlos y los feitos que han pasau. “Ye o nuestro deber no deixar mica espacio t’o faixismo, nian una pulgada”, ha declarau o president d’a Republica griega KarolosPapoulias. O debat sobre a legalidat de Amaneixer Dorau y as collas faixistas ha rebilcau tamién dende iste asesinato y se planteyan ya modificacions legals.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.