Prou seguimiento d’a vada cheneral d’educación en Aragón

O seguimiento d'a vada ye de mas d'un 70% seguntes os sindicatos y un 58,15% seguntes o Gubierno d'Aragón. Ista tardi i hai mas movilizacions.

Concentración en a Consellería d'Educación (Zaragoza). Foto: Arainfo

Hue 22 de mayo yera clamau t’a vada contra os retalles en educación y a puyada de tasas universitarias aprebadas por o Gubierno espanyol tot o personal educativo y de servicios y os estudiants en totz os rans d’amostranza formal. O seguimiento seguntes os sindicatos ye de mas d’un 70% en o profesorau y mesmo mas d’un 90% en a estudiantalla. Os datos d’o Gubierno d’Aragón son d’un 58,25% de seguimiento, uno d’os mas altos de l’Estau seguntes as fuents gubernamentals. En bells institutos d’o país i ha habiu encierros y s’ha feito nueit en ells como en o caso d’Albarracín (que ya prencipió fa diyas), Fraga, Uesca u Zaragoza.

A chornada ha contau con numerosos piquetes en os centros educativos d’infantil, primaria y secundaria, asinas como en os campus d’a Universidat de Zaragoza y ha estau prou tranquila. Manimenos a Policía espanyola ha intimidau verbalment y ha estau identificando y rechistrando a piquetes en os arredols d’a Universidat y mesmo ha identificau a piquetes aintro d’o recinto universitario, sin contar con o permiso rectoral. A Universidat ha estau trancada quasi de raso.

En Zaragoza han baixau columnas de profesorau, personal de servicios y estudiantalla dende os suyos colechios, institutos y facultatz ent’o Campus d’a Pza. S. Francisco a on se saliba en manifestación dica a Consellería d’Educación. Se i ha constatau una fuerte presencia policial, mas que mas en a Consellería. A manifestación y posterior concentración i ha arroclau a arredol de 20.000 personas. A manifestación ha contau con bells canticos a favor de l’amostranza publica y contra os retalles y o “tasazo”, asinas como se i han ascuitau chiflos, mas que mas en a Consellería d’Educación, a on os concentraus s’han posau por tierra debant d’a policía que protecheba l’edificio.

En Uesca arredol de 1.000 personas s’han concentrau en a Pza. Cervantes y en Teruel unas 300 personas s’han manifestau por as carreras teruelanas rematando en a Pza. d’o Torico a on s’ha realizau una asamblea ciudadana. En a resta de ciudatz, lugars y redoladas no s’han rechistrau incidents y s’ha constatau tamién l’exito d’a vada, seguntes os sindicatos y minimizada por o Gubierno aragonés y mas que mas estatal.

Ista tardi i hai convocadas mas movilizacions, con manifestacions a las 19 h. d’a tardi en as tres capitals aragonesas, amás d’una acampada, prevista en a Universidat de Zaragoza dimpués d’a manifestación.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.