Publicadas as prebas de resistencia d’as centrals nucleyars

L’informe encargau dimpués d’a esferra en Fukushima, deixa a cinco centrals nucleyars difuera d’os minimos que se desichen de seguridat. Organizacions ecolochistas critican o baixo ran de desichencia d’as prebas feitas.

O Consello de Seguridat Nucleyar (CSN) fació publicos os resultaus d’as prebas de stress que se prencipioron a fer dimpués de que lo pasau en Fukushima fese creixer a medrana a un accident nucleyar. Seguntes l’informe, cinco d’as seis centrals nucleyars espanyolas (Almaraz, Ascó, Cofrentes, Garoña y Trillo) son por debaixo d’o ran de desichencia que caleba ta pasar istas prebas. Nomás Vandellós pasó o examen.

Debant d’un tierratremo, denguna d’istas cinco centrals aguantaría. O nuevo ran legal ye de poder concarar aceleracions de 0,3 g (g ye a valor d’a gravedat en a Tierra), quan Ascó y Garoña, por eixemplo, no pueden con más de 0,16g y p,17 g respectivament. Ta fer-se una ideya, o tierratremo de Lorca plegó dica 0,36g. Alavez, todas as centrals, fueras de Vandellós, habrán de fer importants cambeos en as suyas midas de seguridat.

Con tot y con ixo, Isabel Mellado, directora d’o CSN, ha declarau que “no bi ha garra central que no pueda cumplir os obchetivos”. Nomás les caldrá enfortir u cambiar bellas estructuras y elementos d’as centrals. L’informe analiza cadaguna d’as menazas que puedan tener as centrals, pero no diz o qué podría pasar si ocurrise más d’una de vez, como pasó en Fukushima. Sí que diz que as centrals habrán d’estar prestas ta concarar varias menazas de vez.

Organizacions ecolochistas como Greenpeace, Ecologistas en Acción y  Amigos de la Tierra, han feito furas criticas sobre iste informe. As prebas, dicen, han estau pocos desichents y, antimás, las han feito as propias interpresas encargadas de menar as centrals, por lo que dubdan d’a suyas fiabilidat. Bi ha risques humanos que no s’han pensau, como un accident d’avión u un atentau terrorista y tamién critican que no s’haiga evaluau a coincidencia de dos accidents diferents. Paco Castejón, de Ecologistas en Acción, ha remerau que “garra central tien bien apanyau como acumular o hidrocheno y en Fukushima se viyó como isto y as esclatadas de dimpués estioron claus ta agravar l’accident y fer posible as fugas radiactivas”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.