Publican mensaches de mobil entre Rajoy y Bárcenas

O diario El Mundo publica bell mensache de mobil entre Rajoy y Bárcenas y a suya muller. O Gubierno espanyol afirma que son reals y PSOE y IU demandan a dimisión de Rajoy

BárcenasO diario El Mundo ha publicau hue una serie de 10 mensaches de texto de mobil entre o President d’o Gubierno espanyol, Mariano Rajoy y l’extresorero d’o PP Luis Bárcenas y a suya muller, Rosalía Iglesias, entre mayo de 2011 y marzo de 2013. Nomás serían una parte d’os que existen y en ells Rajoy prebaría de convencer a Bárcenas pa que no parlase d’a supuesta contabilidat B d’o PP y os sobresueldos, seguntes El Mundo.

En os primers mensaches, en 2011, Rajoy parla con a muller de Bárcenas, Rosalía Iglesias, decindo-le, en mayo, que “será astí siempre” y atro en setiembre felicitando-le por l’archivo d’a causa contra Bárcenas por o caso Gurtel: “Muitas felicidatz Rosa. Asperemos tot se confirme. Un abrazo y a Luis atro. Mariano”.

Mariano Rajoy preba de tranquilizar a Bárcenas quan tot empecipia a complicar-se mas: “Vale. No ye cierto Luis. Pa que va a fer mal. Yo fablé con ella… Isto no ye facil, no cal entivocar-se. Tranquilidat… Ye l’unico que no se puede perder. Un abrazo”. Bell diya mas tarde: “Luis, cosa no ye facil, pero femos o que podemos. Animo”.

A relación entre Rajoy y Bárcenas se complica en chinero de 2013 quan se publica que Bárcenas manullaba a supuesta contabilidat B d’o PP, y iste demanda a Rajoy que ature a “filtración de Cospedal a El Mundo”. Manimenos, o diario El Mundo niega que Cospedal estase una d’as suyas fuents. Bárcenas diz a Rajoy que “ha de salir ella – Cospedal – a demandar a El Mundo que aporte as prebas“. Bárcenas comenta a Rajoy que puede contar con ell “siempre y sabes que te soi agradeixiu por o refirme que personalment siempre m’has dau”. Rajoy responde con “Luis. L’entiendo. Sé fuerte”. Una semana dimpués, Rajoy declaraba no recordar a zaguer vegada que heba fablau con Bárcenas.

O 14 de marzo de 2013, Bárcenas ye oficialment feito fuera d’o PP y ha d’albandonar o despacho d’a siede central d’o PP en Madrit y ninvia iste mensache a o president espanyol: “Mariano, vergonyoso o comportamiento d’ista tarde d’os dos advogaus d’o partiu. No han permitiu que as personas que he ninviau verifiquen o conteniu d’as caixas que i heba en o despacho que tu m’autoricés. Y remata con “Tú sabrás a qué yes chugando, pero yo quedo liberau de tot compromís con tu y con o partiu“.

O Gubierno espanyol ha confirmau que os mensaches son reals. Manimenos, consideran dende o gubierno que ye una estratechia de Bárcenas pa esbarrar l’atención d’os suyos problemas. Os mensaches pareixe que han estau publicaus con o consentimiento de Bárcenas en respuesta a Alfonso Alonso, portavoz d’o PP en o Congreso d’os Diputaus, que le ha clamau “delinqüent” y “mentirol” ista mesma semana.

Dende a oposición, tot conoixendo o conteniu d’os mensaches, Rubalcaba (PSOE) reclama a dimisión d’o President d’o Gubierno espanyol, Mariano Rajoy, declarando que a situación “ye insostenible”. Asinas mesmo, instará a la resta de collas parlamentarias en a oposición pa acordar una estratechia en caso de que Rajoy no dimita. Luis Centella, portavoz d’IU en o Congreso d’os Dipuatus tamién ha demandau a dimisión de Rajoy y a convocatoria d’eleccions chenerals.

Dende o PP, Carlos Floriano, Vicesecretaire d’Organización y Electoral d’o PP, acusa a o PSOE de “connivencia con un presunto delinqüent” y diz que “le’n fa zero” o que faiga Luis Bárcenas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.