Publican un “Mapa de l’amostranza de l’aragonés”

Quasi 800 personas son en cursos d'aragonés en ista anyada

Mapa de l'amostranza de l'aragonés (Imachen: L'aragonés en a Plana Uesca)

Mapa de l’amostranza de l’aragonés (Imachen: L’aragonés en a Plana Uesca)

A “Federazión de Fablans” ha feito publico, a traviés d’o suyo blog d’o Ligallo de Zaragoza, un Mapa de l’amostranza de l’aragonés a on que replegan os datos de todas las personas que son fendo cursos d’aragonés d’una u atra traza. O mapa ye estau elaborau por Chesús Agustín, qui lo publicó iste martes en o perfil de Facebook “L’aragonés en a Plana Uesca” y dende alavez ye estau a-saber-lo compartiu por os retes socials.

Os datos que se i replegan dan un total de quasi 800 alumnos que son estaus aprendendo aragonés en iste curso. D’ells 387 son ninos y ninas que lo son aprendendo en as escuelas de lugars de l’Alto Aragón como A Espuña, Benás, Bielsa, Biescas, Candarenas, Castilló de Sos, Chaca, Chistén, L’Aínsa, Las Pauls, Pandicosa, Plan, Sallent, Samianigo, Sant Chuan de Plan, Sarabillo, Sarllé, Saúnc, Senegüé y Tramacastiella.

Atras 412 personas lo son aprendendo en os cursos ufiertos por asociacions culturals, socials u sindicals, u mesmo por personas a ran particlar. Zaragoza ye a ciudat a on que más chent ye aprendendo aragonés, con quasi 200 alumnos y con cinco entidatz fendo-ie cursos (A.C. 20 d’abiento, A.C. Nogara, A.C. O trango, Fablans Zaragoza y Universidat). As Cinco Villas ye a siguient redolada a on que más alumnalla bi ha, plegando en 68 alumnos, distribuyius en cursos en Exeya, Uncastiello, Pinsoro, Luesia y Sos. Contino son Barcelona y a Chacetania que tienen más d’una vintena d’alumnos en os cursos que fan en Chaca, Canfranc, Ansó y o Centro Aragonés de Barcelona. Monzón, Balbastro, Uesca, Samianigo y L’Aínsa irían un poco más dezaga pasando a decena d’alumnos cadaguna. A resta de localidatz a on que se son fendo cursos se completa con Biscarrués, Buera, Andorra, Ixar y Plan.

Ta fer o mapa, s’ha contactau dreitament con os responsables d’as asociacions qui han alportau os datos que se i cuaternan. O numer de cursos y alumnos podría estar mesmo más gran, en no haber-ie datos oficials y en no contar-se-ie a chent que lo aprende de traza autodidacta.

 

 

3 Rispuestas a Publican un “Mapa de l’amostranza de l’aragonés”

  1. Pingback: Publican un “Mapa de l’amostranza de l’aragonés” | AraInfo | Achencia de Noticias d´Aragón

  2. Pingback: Quasi 900 personas estudioron aragonés iste curso | Arredol | La Franja

  3. Pingback: Quasi 900 personas estudioron aragonés iste curso | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.