Puerto Venecia ubre hue as suyas puertas

En Puerto Venecia ha ubierto a primer Apple Store d'o país

Dende as 10 h. d’iste chueves o nuevo centro comercial zaragozano Puerto Venecia ya ye ubierto a o publico, dimpués d’a chornada d’enguero d’ahiere a la que i asistioron multiplas personalidatz politicas y interpresarials, como a presidenta aragonesa, Luisa F. Rudi, o president d’as Cortz, José A. Biel, l’alcalde de Zaragoza, Juan A. Belloch, y diversos consellers d’o gubierno aragonés y concellers zaragozanos.

Puerto Venecia empecipió a suya aventura como prochecto fa 14 anyos y cuenta con 230.800 metros quadraus, por o que ye considerau o centro comercial y d’ocio mas gran d’Europa, y tien 138 operadors comercials de toda mena (moda, tecnolochía, cines, ocio, etc.) y 28 cafeterías y restaurants, creyando-se-ie 4.000 puestos de treballo. A inversión en o macrocompleixo ye de 400 millons d’euros. Una d’as suyas singularidatz ye a existencia d’un lago navegable que en hibierno se chelará y se convertirá en una pista de patinache. En o macrocompleixo ye ubierta tamién a primer Apple Store d’o país, con más de 70 triballadors y un camatón d’actividatz rilacionadas con a firma informatica.

As esferents autoridatz han alabau as grans posibilidatz de dinamización d’a economía aragonesa con iste prochecto comercial en tiempos de crisi economica, asperando-se-ie 20 millons de visitas a l’anyo. Manimenos encara no i son todas as interpresas ni son cubiertos totz os puestos de treballo.

Por agora, y dica cabo d’octubre, puede ir-se-ne con os autobuses 31 y C4, mientres que dende alavez, nomás podrá fer-se servir ta ir-ie a linia 31.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.