Putin considera un “grau crimen” l’uso d’a fuerza en o sudeste d’Ucraína

A ofensiva ucrainiana en l'este d'o país se convierte en un fracaso en perder mas edificios gubernamentals. Unidatz militars ucrainianas cambean de bando

Prorrusos se manifiestan en Donetsk. Foto: Andrew Butko (CC-BY-SA)

Prorrusos se manifiestan en Donetsk. Foto: Andrew Butko (CC-BY-SA)

O president ruso, Vladimir Putin, calificó de “grau crimen” l’uso d’a fuerza militar por parte d’o Gubierno de Kiev contra os prorrusos que s’han sublevau en o sudeste d’Ucraína. “Han ninviau tanques y aviación contra a población civil (…) Y isto ye unatro grau crimen d’os que hue gubiernan en Kiev”, ha dito Putin en directo por televisión.

O chefe d’o Kremlin apuntó que as autoridatz de Kiev, en cuenta de prener consciencia que “bella cosa va mal en o Estau ucrainiano y de fer un poder por dialogar, redobloron as suyas menazas d’actuar con a fuerza” contra a población civil.

Putin ha refusau de traza categorica y ha calificau de “fatera” as acusacions de Kiev y Occident sobre a participación de militars y achents d’os servicios secretos rusos en os escayecimientos en o sudeste d’Ucraína. “En l’este d’Ucraína no bi ha garra unidat militar rusa. No bi ha servicios secretos ni tampoco instructors. Son totz chent d’o lugar. Y a millor preba d’ixo ye que, literalment, a chent va a cara descubierta”, ha remarcau.

“Considero muit important o comienzo d’as negociacions de hue, porque considero que ye crucial que pensemos chuntos en cómo salir d’a situación”, adhibió o president ruso sobre as conversacions a quatro bandas (Rusia, Ucraína, Estaus Unius y a Unión Europea) que se celebran iste chueves en Chinebra. Putin recalcó que como resultau d’ixas negociacions sobre a crisi ucrainiana se debe de proposar a la chent d’o sudeste d’Ucraína un “dialogo real, y no de cara a la galería”.

S’atasca a operación militar contra os prorrusos en l’este d’Ucraína

Seguntes publica Gara, a operación militar lanzada por o gubierno de Kiev contra os activistas prorrusos en l’este d’o país se ye convertindo con cada hora que pasa en un fracaso de mayors dimensions. As fuerzas ucrainianas no solament no han ganau terreno a os partidarios d’unir-se a Rusia, sino que han perdiu mas edificios oficials en a rechión de Donetsk, y han visto cómo parte d’as tropas que participan en a operación cambiaba de bando chunto a os suyos vehíclos blindaus de combate.

Seguntes a OTAN, Moscú ha desplegau a lo menos 40.000 soldaus en a suya muga con Ucraína. Por a suya parte, Moscú acusa a Washington y Bruselas de dar emparo a o rechimen interino ucrainés, que no reconoixe como lechitimo, y acusó a Nacions Unidas d’haber preso partiu por Kiev y os suyos aliaus.

Fuent: http://arainfo.org/2014/04/putin-tacha-de-grave-crimen-el-uso-de-la-fuerza-en-el-sureste-de-ucrania/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.