Puyalón apuesta por chuntar-se con “prochectos rupturistas” t’as eleccions europeas

Tamién critica as zaguers declaracions de CHA y les acusa de "chirar enta o rechionalismo"

Foto: Puyalon

Foto: Puyalon

O partiu independentista aragonés Puyalón de Cuchas, ha confirmau iste viernes os contactos mantenius con o partiu vasco EH Bildu, de cara a charrar sobre a posibilidat de fer una coalición de conchunta con atros partius ta presentar-se a las eleccions europeas. A formación independetista vasca ye tenendo en istos diyas reunions con formacions nacionalistas y independentistas de tot l’estau ta fer a parola sobre ixas posibles alianzas.

Ta Zesar Corella, Coordinador Nacional de Puyalón, ixe partiu “tien claro que a situación d’Euskal Herria no se puet levar t’a resta de Pueblos de l’estau. O camín encetau en Euskal Herria de chuntar fuerzas d’as diferents formacions soberanistas y de cuchas en pro d’una normalización politica y un cambio de modelo ye fendo fruitos en ixe país.” Corella s’ha amostrau critico, con tot y con ixo, con as reunions que ye tenendo Bildu con atras fuerzas politicas: “no creyemos posible a conformación d’una coalición si i tienen preponderancia as posicions socialdemocratas de ERC (Esquerra Republicana de Catalunya) muito aluenyadas d’o prochecto rupturista que nusatros representamos.

A propuesta de Puyalón ta Europa demanda “solucions que no pueden plegar sin l’apuesta d’un modelo d’integración europea que crebe de tot con l’euro y as suyas estructuras neoliberals. As solucions pasan por crebar as relacions creyadas por l’ultraliberalismo y dar a os Pueblos ferramientas economicas y poder”.

Puyalón tamién s’ha amostrau muito critico con CHA. Chunta Aragonesista tamién se reunió con EH Bildu, encara que a escape Juan Martín, Secretario Cheneral d’a formación, descartó a posibilidat d’a coalición con partius independentistas vía Twitter: “No soy partidario de concurrir en coalición a las europeas con partidos que apoyen opciones independentistas No es el camino.” Ta Puyalón, istas parolas suposan un “chiro rechionalista aluenyau d’as posturas que ha teniu en as zaguer decadas“, y “les amana a o PAR u IU”. Tamién, diz Zésar Corella “suposan un trango enta zaga en a luita por a recuperación d’os dreitos y libertatz nacionals d’Aragón”.

“Si a linia d’actuación de fer viyer o soberanismo como o diaple ye refirmada a la fin por l’Asambleya de CHA, será un grieu retacule en o camín por a recuperación d’a soberanía furtada a los aragoneses y aragonesas”, adhibe Corella. “En tot caso, Puyalón de Cuchas treballará con todas as organizacions y personas que quieran enantar enta un Aragón libre y soberano“, remata.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.