Puyalón de Cuchas demanda tamién a dimisión de María José Ferrando

O partiu diz que as suyas parolas "contrimuestran a suya incapacidat cultural". A coordinadora d'a ponencia d'a lei de no luengas ye estada prou criticada por as suyas declaracions

Rueda de prensa de Puyalón

Rueda de prensa de Puyalón

As declaracions d’a diputada d’o PP María José Ferrando continan provocando reaccions entre os partius y organizacions socials aragoneses. Puyalón de Cuchas ha demandau iste viernes a dimisión d’a coordinadora d’a ponencia sobre a lei de luengas, como tamién facioron fa bells diyas IU y CHA.

María José Ferrando provocó un tierratremo politico con as declaracions que fació o lunes decindo que as esmiendas t’a lei de no luengas presentadas por PSOE, CHA y IU trayerían un malfurrie de 35 millons d’euros, sin ufrir os calculos a on que se basa a cifra, y que obligaría a achustar a 1400 traductors. As declaracions son estadas refusadas por toda mena de  partius politicos y organizacions que no han dubdau en demandar a suya dimisión.

Ta Puyalón, as declaracions d’a diputada “no fan que contrimostrar a incapacidat cultural y de conoiximiento” suyo y vinclan a ponencia con a Plataforma “No hablamos catalán” d’a que’n fan parti “elementos extremistas de dubdosa lechitimidat democratica”, seguntes ista formación. A istos elementos exremistas son a los que Puyalón culpa de que no s’haiga puesto “desembolicar una lei digna de luengas ni garra ponencia mientres 30 anyos de democracia. Una democracia ficticia que deixa sin dreito d’expresión y comunicación a millars d’aragonesas/es.”

En o comunicau feito publico, Puyalón ha criticau a hipocresía d’os sectors que sí que demanda “lespanyolismo en foros europeus u internacionals, do a incapacidat u arrogancia d’os politicos les impide seguir garra lectura u charrada en anglés” y meteban d’eixemplo a Ana Botella en a presentación de Madrit debant d’o COI. Tamién remeran o fascal de diners presupuestaus t’o “Instituto Cervantes” que “sacaría a tot estrús d’os problemas de financión en Aragón ta l’amostranza, sanidat u lei de dependencia.”

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.