Puyalón presienta o documento “Mete-le color”

Se i presientan propuestas concretas "ta dar un chiro radical a la situación d'Aragón"

Imachen d'a presentación (Foto: Arainfo)

Imachen d’a presentación (Foto: Arainfo)

O partiu independentista Puyalón de Cucas ha presentau iste chueves o documento “Mete-le color a la foscor“, con más de trenta propuestas concretas, que “preba de meter bella poqueta de color a ista situación cheneral de foscor y desanimo que s’ha instalau en a sociedat aragonesa”. “Trayemos a los ciudadans aragoneses o treballo d’a nuestra organización ta, no nomás salir d’a crisi d’agora, sino tamién ta dar un chiro radical a la situación d’o nuestro Pueblo“.

Os portavoces d’a organización han esfendiu crebar “os vinclos que mantienen uniu a ista Pueblo con l’Estau espanyol“. Ta Zésar Corella “ye evident que hue, remanir en o marco de l’Estau espanyol y de l’actual Unión Europea ye más un problema que una solución”.

O documento ye trestallau en quatre grans bloques: midas politicas, socioeconomicas, socioculturals y en esfensa d’a Tierra. As propuestas van dende l’ature d’os esfuizamientos y a nacionalización d’a banca dica o reconoiximiento d’Aragón como sucheto soberano de pleno dreito, pasando por a creyación d’un Marco Aragonés de Relacions Laborals, u d’una Lei Aragonesa d’Educación que s’adapte a la idiosincrasia aragonesa.

“Mete-le color a la foscor s’ha treballau dende as asambleyas sectorials y comarcals d’o partiu“, explica Chesús Royo, portavoz d’a formación independentista, “cadaguna d’as propuestas concretas levará un desembolique más extenso que se irá fendo publico a partir de febrer y mientres tot l’anyo, permitindo a los ciudadans y colectivos aragoneses alportar-ie as suyas propuestas y amilloras”.

Ta Puyalón, “o tiempo d’as incherencias se remató. Agora queda valurar entre todas si istas propuestas son las que calen ta salir d’a situación actual, ta que os treballadors y treballaderas no sigan qui paguen a crisi, ni nomás comparsas de dirichents politicos que no ascuitan a lo pueblo”. “Nomás o Pueblo aragonés tien dreito a decidir como iste territorio ha d’organizar-se, chestionar-se y relacionar-se con atros”, adhiben.

O documento completo se puede leyer en a web de Puyalón, qui anuncian que lo levarán ta “diferents asociacions, colectivos, partius y sindicatos d’o país ta fer-lo conoixer”.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.