Quan falta un anyo pa lo referendum d’independencia d’Escocia, enqüestas pa toda mena de gustos

Un sondeu comisionau por o SNP sitúa o "sí" un punto percentual por debant d'o "no". Contrasta enormement con a enqüesta de YouGov pa un grupo autonomista

escocia referendumO Partiu Nacional Escocés (SNP, siglas en anglés) ha sorprendiu hue con a publicación d’una enqüesta seguntes a quala o “sí” trahie una avantalla d’un punto percentual debant d’o “no”, chusto quan queda un anyo pa lo referendum d’independencia d’Escocia. Seguntes o sondeu, comisionau por o partiu y elaborau por a interpresa Panelbase sobre una muestra de 1.043 personas, o 44% d’os escoceses votarían a favor d’a independencia, o 43% en contra, y o 13% no lo saben. En o partiu han celebrau istes resultaus, dicindo que son o refleixo d’o feito que a campanya d’o “sí” ye “positiva” y que isto ye superando os argumentos “d’o espanto” d’a campanya d’o “no”.

Istes datos, manimenos, contrastan de tot con a enqüesta que ha publicau atra interpresa, YouGov, iste cabo de semana. Os datos d’o sondeu -que tamién ha comisionau un grupo politico, DevoPlus, partidario de mantener Escocia dentro d’o Reino Uniu pero con mas autonomía- son rotundas: solament votarían a favor d’a independencia o 29% d’os escoceses, mientres que o 59% refusarían de salir d’o Reino Uniu. De feito, a enqüesta apunta que os contrarios a la independencia son agora quatro puntos percentuals mas que no l’octubre pasau, quan a mesma interpresa fació un sondeu similar.

De feito, a enqüesta comisionada por o SNP ye a unica que, en o zaguer anyo, ha amostrau que o “sí” ye por debant d’o “no”. Todas as atras que s’han publicau siempre meten por debant d’os partidarios de mantener a unidat d’o Reino Uniu. Ixo sí, con marguins cheneralment d’entre 10 y 20 puntos percentuals, distancias que dende a campanya independentista siempre s’ha insistiu que yeran recuperables.

O referéndum sobre a independencia d’Escocia se celebrará o 18 de setiembre de 2014, con a pregunta siguient: “Escocia habría d’estar un país independient?“.

Fuent: http://www.nationalia.cat/ca/noticies/1542

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.