Quasi 500 alegacions en o Ministerio d’Industria contra a mina de potasa que Geoalcali quiere ubrir en Aragón

Dende a Plataforma Unitaria Contra as Minas de Potasa aseguran que Geoalcali “prebaba d'amagar información baixo promesas economicas en traza de puestos de treballo”

Undués de Lerda. Foto: Gunnar Wrobel (CC-BY-SA 2.0)

Undués de Lerda. Foto: Gunnar Wrobel (CC-BY-SA 2.0)

A Dirección Cheneral de Politica Enerchetica y Minas d’o Ministerio d’Industria, Enerchía y Turismo ha recibiu quasi 500 alegacions contra o Prochecto Mina Muga, con o que a interpresa Geoalcali pretende d’explotar una mina de potasa entre 24 anyos entre Aragón y Nabarra. Unas 460 en son sinyadas de traza individual por os vecins d’as prencipals localidatz afectadas: Undués de Lerda (Aragón, que ye do se situarán as bocaminas), Sangüesa (Nabarra, puesto eslechiu pa emplazar a planta de tractamiento), y Javier (tamién en suelo nabarro).

A istas cal sumar as rubricadas por Chunta Aragonesista (CHA), CGT, Ecolochistas en Acción, Amigos d’a Tierra, Fundación Sustrai Erakuntza y os consistorios d’Undués de Lerda, Sangüesa y Javier. Os representants d’a Plataforma Unitaria Contra as Minas de Potasa han estau os encargaus de replegar gran parte d’as alegacions individuals.

 Son varios os motivos argumentaus en istas alegacions pa oposar-se frontalment a o prochecto: de traza chenerica denuncian que en a documentación aportada por a interpresa “no se tractan con o minimo rigor y dilichencia aspectos de sobra conoixius por chenerar afeccions a l’entorno”, amás d’existir “numerosas incorreccions y un intrés manifiesto pa que no se pueda acceder de traza eficaz a la información”. En a suya opinión, Geoalcali “tractaba d’amagar información baixo promesas economicas en traza de puestos de treballo”.

Os prencipals risgos denunciaus son os fundimientos de terreno, a seguranza d’os propios treballadors y o risgo sismico. Alegando, en iste zaguer punto, que no se tienen en cuenta os plans de risgos d’o Gubierno d’Aragón u de l’Instituto Cheografico Nacional “que elevan a un factor de x5 o risgo valorau en a normativa sismorresistent”.

Tamién se refieren a que l’actividat sismica, as vibracions y a cheneración d’explosions tienen una “clara relación con o desenrollo d’eslizamientos”; y que isto puede afectar a la estabilidat d’a propia estructura d’o entibo de Yesa, que ha sufriu eslizamientos arredol d’a mina en todas dos marguins d’o mesmo.

Sinyalan, igualment en as alegacions, que a explotación va a retraer d’o subsuelo quasi 800 millons de litros d’augua “con a consiguient afección a os aqüifers, l’agricultura y o medio natural d’a zona”. Amás, meten l’accento en que o transporte d’os materials d’a explotación “suposará un movimiento de 6 millons de toneladas a l’anyo dende a mina a la explotación de Sangüesa, y que tiene un claro impacto en o medio natural d’a zona por a suya actividat de 365 días a l’anyo entre as 24 horas d’o día”.

Dende a suya creyación, a Plataforma Unitaria Contra as minas de Potasa ha realizau charradas informativas y reunions en os lugars afectaus. Dica agora, aseguran, valoran “muit positivament o treballo realizau”. Con o proposito de fer vistero o que ells consideran un prochecto altament perchudicial contan con l’emparo y asesoramiento d’Óscar Pueyo, doctor en Cheolochía en a Universidat de Zaragoza.

Fuent: http://www.eldiario.es/aragon/economia/alegaciones-Ministerio-Industria-Geoalcali-Aragon_0_428357640.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.