Quatre presos mapuches, hespitalizaus dimpués de fer mes y meyo de vada de fambre

Os vaders reivindican a derogación d'a Lei antiterrorista y un chuicio civil. Incidents mientres a visita d'o president de Chile t'o territorio mapuche

Lago Alumine, en territorio Mapuche (Foto: Fotopedia)

Camín t’o lago Alumine, en territorio Mapuche (Foto: Fotopedia)

Quatre presos mapuches que fa mes y meyo son en vada de fambre ta protestar contra a lechislación de Chile, son estaus ingresaus en l’hespital a causa d’o suyo mal estau de salut. Paulino Levipán, Daniel Levinao, Rodrigo Montoya y Erick Montoya, internos d’as prisión d’Angol, cumplen penas de prisión (os dos primers) u son imputaus asperando chuicio (os dos zaguers) por presuntos homicidios frustraus de policias chilenos.

Os procesos se fan por o codigo d’a chusticia militar, como prevei a Lei antiterrorista chilena, que ye d’as envueltas d’a dictadura d’Augusto Pinochet y que ye estada esviellada, pero no derogada. Os vaders reclaman, precisament, que a lei siga cancelada y que os suyos chuicios sigan civils: os procesos militars tienen como conseqüencia pensa de prisión más largas, y o movimiento politico mapuche ye convenciu que Chile contina con a Lei Antiterrorista en vigor ta reprimir as demandas d’os activistas indichenas.

A qüestión ha plegau en diferents instancias internacionals. Asinas, por eixemplo, a eurodiputada Ana Miranda (Bloque Nacionalista Gallego) y a Organización de Nacions y Pueblos no Representaus (UNPO) ha inviau una carta a o president chileno, Sebastián Piñera, a on que le demandan o compromís de trobar una “solución humanitaria” a la vada de fambre. Una vada, dicen os sinyants, que se debe a la “situación intolerable” que sufre o pueblo mapuche en Chile.

A situación d’os quatre presos ha chenerau un movimiento de solidaridat entre os mapuches de Chile, qui han feito diversas manifestacions y protestas mientres os zaguers diyas. En una manifestación en Conceopción -a ciudat a on se trobar l’hesppital a on que agora son ingresaus os vaders-, se producioron incidents entre os manifestants y a policia, con o resultau de quatre personas detenidas, entre ellas, as mais de dos d’os presos.

En Ercilla, una colla d’activistas mapuches exichioron a o president de Chile, Sebastián Piñera, a liberación d’os presos y lo calificoron de “terrorista y falso”. A policia empachó que os activistas fesen a protesta, oficialment ta guaranciar a seguridat d’o mandatario, qui respondió decindo que os presos en vada de fambre son un “camatón de delinqüents”.

Piñera yera en Ercilla ta participar en a primer sesión d’a mesa de treballo de l’Area de Desembolique Indichena (ADI) d’ista localidat, un organismo creyau iste mes d’octobre de más d’o gubierno chileno ta canalizar o dialogo con os mapuches. Manimenos bi ha cinco comunidatz mapuches d’Ercilla (d’un total de 42) que no han quiesto fer parti de l’ADI porque consideran que o nuevo organismo no aborda o fundo d’o conflicto, uqe ye a tornada d’as tierras t’o pueblo mapuche y establir bella traza d’autogubierno ta iste pueblo orichinario.

 

Fuent: http://www.nationalia.cat/ca/noticies/1235

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.