Quatre prochectos aragoneses t’achiquir as emisions de gases d’efecto hibernader

Son estaus trigaus por o Foro Espanyol de Carbono t'o "Prochecto Orache"

logQuatre prochectos aragoneses son estaus trigaus, entre os 194 presentaus, ta fer parti d’os “Prochectos Orache” que prebarán de achiquir as emisions de gases d’efecto hibernader en sectors “difusos” como agricultura, transporte, residencial u repuis. Ista convocatoria ye feita por o Consello Rector d’o Fundo Espanyol de Carbono FES-CO2, chestionau por a Oficina Espanyola de Cambio de l’Orache d’o Ministerio de Agricultura, Alimentación y Meyo Ambient. As emisions evitadas serán adquiridas por ixe fundo, contribuyindo a la viabilidat financiera d’os prochectos. Se preveye que se deixen de fer más d’un millón de toneladas de CO2 en as venients quatre anyadas.

Prencipia agora a fase d’execución d’os prochectos, a on que istos habrán de fer un seguimiento y medir as quantos gases deixan d’emitir, d’alcuerdo con as metodolochías que aseguren a fiabilidat d’os datos. Tamién habrán de someter-se a la verificación establida por o Fundo de Carbono, y a las que serán realizada por entidatz independients reconoixidas ta verificar que efectivament se fan menos gases.

D’os quatre prochetos trigaus, tres son d’o sectos agrario y uno d’o residencial y tres son d’entidatz publicas y uno d’una interpresa aragonesa. Dos prochectos son estaus promovius por o Departamento d’Agricultura, Ganadería y Meyo Ambient d’o Gubierno d’Aragón y son as Plantas de Tractamiento de Purins de Penyarroya de Tastavins y de Val de Robres, con un potencial de reducción de 11.667 y de 14.571 de CO2eq/anyada, respectivament.

En as plantas, o fiemo ye tractau de traza que bi ha una depuración biolochica d’os compuestos nitrochenaus y se produce biogás, dimpués d’un embolicau proceso de dichestión anaerobia, que alimenta una chicota planta de cocheneración. Istas operacions achiquen muito, con respecto a la chestión tradicional, a emisión de gases d’efecto hibernader. Antimás, baixa tamién o risque de contaminación por nitratos d’as auguas, causada por l’aplicación en suelos agricolas, de masiadas cantidatz de purins.

Os prochectos presentaus por o Departamento de Agricultura, Ganadería y Meyo Ambient son estaus feitos de traza coordinada por os servicios tecnicos d’a Dirección Cheneral de Calidat Ambiental, o departamento de I+D+i d’a interpresa publica SARGA y l’Instituto Aragonés de l’Augua, titular d’as debanditas plantas.

Montajes Longares S.L. ye a interpresa esleixida ta fer o suyo prochecto “Reducción de CO2 en tractamiento de depuración de purins de tocins en torres” y o quarteno prochecto ye d’a Federación Aragonesa de Municipios, Comarcas y Provincias (FAMCP) qui ferán a “Sustitución de calderas de combustible fosil por calderas de biomasa en a climatización de edificios publicos d’os Municipios d’Aragón”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.