Que a nueit no te trafuque

Gonzalo González

Qui han provocau a crisi economica continan repetindo, terne que terne, que tot ye muit mal. Y resulta sospitoso que se faigan tant cansaus, como si o negro estase mas negro a pur d’insistir. Pero tot empecipia a entender-se quan nos indican que i hai una luz a la fin d’o tunel, y que ya con l’espanto en o cuerpo, ells nos salvarán siempre que nos deixemos levar d’a suya man por o solo camín posible.

Ixe camín ye aumentar os impuestos y achiquir o gasto publico. A politica fiscal heba estau dica agora a prencipal ferramienta ta aconseguir una redistribución d’a riqueza. Agora mesmo a dreita puya impuestos. Rarizo, no? L’invento funciona ya que Mas aconsiguió en Catalunya aumentar en votos a tamás de fer retalladas y Rajoy ha aumentau os suyos refirmes en os sondeyos dimpués d’as eslecions encara que ya ha empecipiau a amostrar a suya politica economica.

As continas puyadas d’impuestos, tanto directos como indirectos, no van a servir ta financiar servicios publicos. O suyo recorriu se tuerce, y luen d’a suya anterior finalidat publica remata en buena mida en mans privadas. No imos a bosar mas impuestos ta tener, sisquiá mantener, a sanidat u a educación. Agora os diners publicos s’emplegan ta financiar a reestructuración d’o sistema financiero, o pago d’os intréses d’a deuda soberana y a financiación privada de grans obras publicas de dubdosa utilidat pero que oscuros intréses fación enantar. Ye dicir, simple y planament diners t’os bancos.

Si amás adhibismo as retalladas d’o gasto publico, en qué queda a politica fiscal d’o sieglo XXI? En una simpla sincusa recaudatoria privada escando emparo en a medrana social. Queda fiero dicir que se puyan os impuestos ta bosar a os bancos, asinas que os neoliberals se puyan ta la socialización d’as perdas vía fiscal. Impuestos si, pero no ta isto.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.