Quebec frenará a puyada d’as tasas universitarias y remata a vada estudiantil

O nuevo gubierno d'o Partiu Quebequés anula as decicions de l'anterior gubierno de puyar as tasas en as universidatz. A estudiantalla mete fin a siet meses de luita

Foto: Socialist Canada, Socialist Quebec: http://www.flickr.com/photos/lariposte/

Os estudiants de Quebec han consiguiu una victoria important dimpués d’haber permaneixiu en vada indefinida mientres siet meses en institutos y universidatz, forzando as eleccions en as que fa poco ganó o Partiu Quebequés, que anulará a puyada de tasas universitarias, asinas como ferá o mesmo con a Lei 12 que restrinchió as libertatz d’expresión, asociación y reunión, debant d’as grans movilizacions estudiantils y as confrontacions con a policía, que rematoron con 2.500 personas detenidas mientres totz os meses de vada indefinida y que no consiguió frenar as protestas.

En febrero, o gubierno quebequés d’o Partiu Liberal puyaba un 75% as matriclas universitarias, feito que desencadenó a vada indefinida estudiantil. Pauline Marois, a muller que ha preso o relevo en o gubierno quebequés, prometió que anularía a puyada de tasas, manimenos achustará a la inflación istas tasas, con o que no aturarán de raso o suyo creiximiento.

A tamás d’o goyo d’as asociacions estudiantils, continarán cusirando as accions d’o nuevo gubierno. De feito, a federación estudiantil “La Classe” ha convocau t’o diya 22 de setiembre una manifestación ta contrimostrar que a luita encara no ha rematau de raso, a tamás d’a fin d’a vada.

Ista vada en Quebec, territorio baixo soberanía canadenca, estió o mayor conflicto estudiantil en iste anyo 2012, que dimpués de siet meses de manifestacions y accions en as carreras y en os centros d’amostranza, ha rematau esboldregando a o gubierno liberal de Jean Charest, redotau por un radiu marguin en as eleccions por a independentista Pauline Marois. Manimenos, a estudiantalla continará planteyando as suyas reivindicacions a la nueva primer ministra y o suyo gubierno.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.