Quidditch, o nuevo esporte

Entre o 19 y o 21 d’agosto, Zaragoza estió seu d’a segunda Copa Transpirenaica de Quidditch,

Carlos Mainz Escartín

Un momento d'un partiu de Quidditch

Un momento d’un partiu de Quidditch

Sotz fartos como yo d’o fútbol? Fartos de querer conoixer información esportiva y que o 80% d’a información d’os medios siga sobre fútbol u sobre a vida d’os chugadors que no tiene cosa a veyer con o esporte, ente que d’atros esportes no en charren mica?

A on ye o Club Chelo Chaca, uno d’os millors clubs de hockey chelo d’a peninsula en os medios? A on ye Javier Raya u Javier Fernández, dos d’os millors patinadors artisticos sobre chelo? A on ye Teresa Perales, a millor nadadora paraolimpica? A on ye Carolina Marín, campiona mundial de badminton u as atletas Isabel Macías o María José Poves, u Andres Mir, chugador de hockey hierba o Saul Craviotto, campión olimpico de piragua? A nivel d’Aragón ye verdat que s’informa millor, pero a nivel de l’estau y más que más en os medios chenerals de prensa y televisión, domina o futbol y poco más. Istos diyas, gracias a os Chuegos Olimpicos se ha charrau mas d’atros esportes (de seguras porque encara no heba prencipiau a temporada de futbol) pero ye penible que calga asperar 4 anyos pa que atras opcions esportivas sigan conoixidas. Y si se tornan conoixidas ye quasi de seguras porque se ha plegau a ganar medalla, somos asinas de pretos. Fueras d’o futbol, baloncesto, F1 u as motos, no bi ha cosa y o pior ye que antimás se charra d’istos esportes de traza heterocentrica y masclista.

Pues hue charraremos d’atra opción esportiva, que preba de trobar o suyo espacio, o Quidditch.

Os Orichens

Prexino que muitos de vusotros sotz fans, como yo, de Harry Potter y si en sotz muit fans, conoixeretz  o esporte preferito d’o mundo machico, o Quidditch. Muitos hemos quiesto chugar-ie, y agora ya podemos!

O Quidditch naixió d’Anglaterra en a Edat Meya, en o entibo de Querrditch y se chuga dencima de escobas voladoras, con 4 pilotas y 7 chugadors por equipo. Ye o esporte mas popular d’os magos y bruixas. Pero o Quidditch real, o “Muggle” (no machico),  prencipió en bellas universidatz d’Os Estatos Unitos, en 2005 y encara que se leva escoba, istas no vuelan. Fueras d’isto y atros chicorrons detalles, ye quasi lo mesmo que lo que leyemos en os libros.

Encara que prencipió gracias a Harry Potter, hue o Quidditch s’ha desembolicau de traza independient.

Chugadors, pilotas y reglas

Como en o esporte orichinal, tenemos 7 chugadors por equipo: 3 cazataires, 2 golpeadors, 1 guardián y o buscador.

Los cazataires han de fer os gols en as porterias, que son 3 roldes en cada costau d’o terreno de chuego. Os cazataires chugan con un pilota que se clama “Quaffle”. Cada vegada que os cazataires fan un gol, ganan 10 puntos.

O guardián desfiende os roldes.

Os golpeadors, que en o Quidditch orichinal levan unos bates con que trucan unas pilotas que vuelan solas y que se dicen “Bludgers”, han de fer cayer a os chugadors de l’atro equipo y desfender a os suyos companyers. En o Quidditch real, chugan a una mena de “pilotón prisionero”, y entre que desfienden a os suyos companyers d’os trucazos d’os golpeadors de l’atro equipo, han de foter trucazos, ta eliminar a os chugadors contrarios.

Cada vegada que a un chugador le trucan con a pilota d’o golpeador, ye eliminau, y ha de tocar os suyos roldes pa tornar t’o chuego.

O buscador, en o Quidditch orichinal, ha d’agafar una chicorrona y rapeda pilota, que vuela sola y que se dice “Snitch”. En o Quidditch muggle, ista pilota, chicorrona, ye penchada d’o cincho de una persona, que ha de correr por o campo a partir d’o menuto 16 d’o chuego y poco dimpués salen os buscadors, que han de pillar-la. No cal decir que a persona que leva penchada a snitch ha de estar rapeda y achil, ta fer mas intresant o chuego. Os buscadors prebaran de pillar a snitch uno a uno, podendo estar eliminaus si una bludger les fote un trucazo, por lo que un golpeador habrá de desfender a o buscador ente que pilla a snitch y si un golpeador elimina a o golpeador y a o buscador, puede prebar de pillar a snitch l’atro buscador. Quan bell buscador pilla a snitch, se remata o chuego y o suyo equipo gana 30 puntos.

Bi ha atras diferencias entre o Quidditch real y o muggle con as pilotas. En o chuego muggle as pilotas no vuelan solas y bi ha 3 bludgers, no dos, pa que bi haiga mas oportunidatz de chuego ta totz os golpeadors. A snitch, que no vuela, en o Quidditch real, vale 150 puntos pa o equipo que la pille, en o chuego muggle, no en vale que 30.

O Quidditch Muggle hue

Hue, o Quidditch no ye un chuego de quatre frikis de Harry Potter, dimpués de 10 anyos ye un esporte reconoixiu y que tien asociacions e institucions a nivel local, nacional e internacional, a on que se chuntan mas de 300 equipos de tot o mundo.

A nivel internacional, o esporte ye organizau por la I.Q.A. (International Quidditch Association) encara que os eventos menors los paran as asociacions locals u nacionals.

En Espanya ye la Asociación Quidditch España, que acaba de creyar-se fa un anyo, qui para la Copa de Espanya y tien selección propia. Tamién bi ha atra asociación, la Asociació de Quidditch de Catalunya, con Copa y selección propias. Ista estió a primer asociación que prencipió con o Quidditch en a peninsula, pero a escape naixioron atros equipos y asociacions por o Estau y hue bi ha mas de 20 equipos de Quidditch y ligas en Galiza, Castiella, Euskadi y Andalucia. Quasi totz os equipos de Espanya chuegan en a Liga Espanyola, pero tamién ye a Liga Catalana a on que chugan equipos catalans y o equipo aragonés, Imperius Zaragoza.

Como he dito antes, bi ha eventos internacionals y hue se chuega en Europa a Copa d’Europa (O zaguer campionato se chugó en Gallipolli, Italia) y tamién bi ha Mundials, que se chugoron iste estiu en Frankfurt d’o Main, Alemanya.

Y o Quidditch plegó en Zaragoza

En Aragón no podebanos estar menos y tamién tenemos equipo de Quidditch, en iste inte l’unico equipo d’ Aragón ya que o equipo de Uesca no acaba de creyar-se. O equipo ye Imperius Zaragoza, que prene o suyo nombre d’una d’as Maldizións Imperdonables u Insincusables (bi’n ha tres: a maldición Cruciatus, que sirve ta torturar, a maldición Imperius, que sirve ta gubernar a qui plegue a maldición, como si estase un monyaco, y maldición Avada Kedabra, que mata). Se suposa que o nombre ye nomás pa fer miedo, porque son buena chent y chugan sin fer trampas.

Imperius Zaragoza ye o quarto equipo mas antigo d’o Estau y prencipió gracias a Internet, quan una colla de chent de Zaragoza viyó en Internet que a un equipo de Galiza le caleba chent pa chugar a Quidditch y quan estió platero que no yera groma, naixió o equipo aragonés.

Hue ye un equipo reconoixiu en Aragón, u siga, ye un equipo y un esporte real, reconoixiu como tal, baixo o nombre de Quidditch Aragón, con a ideya de que en o futuro bi haiga más equipos en Aragón.

A regla d’o chenero u de “maximo 4” y a comunidat LGBTIQ

O Quidditch, a diferencia d’a resta d’a mayoria d’esportes, mira siempre de que bi haiga igualdat de chenero en o campo de chuego, os equipos son mixtos y un equipo puede tener chugando un maximo de 4 chugadors d’o mesmo chenero, y ha de haber lo menos dos chugadors de un chenero distinto a o mayoritario. O chenero con que se identifique o chugador ye o que cuenta pa chugar, no estando important o sexo fisico.

Muito important ye tamién como o Quidditch ha estau uno d’os primeros esportes inclusivos, incluyindo-ie a comunidat LGBTIQ, toda una novedat en o mundo esportivo. Ye un esporte a on que a homofobia y transfobia ye vedada y castigada.

A Copa Transpirenaica

Entre o 19 y o 21 d’agosto, Zaragoza estió seu  d’a segunda Copa Transpirenaica de Quidditch, una copa rechional que chunta a equipos d’o Norte y Sur d’os Pirineus. Son plegaus iste cabo de semana en Zaragoza equipos de Euskadi y Catalunya, antimás d’os anfitrions aragoneses. I yeran cnvidaus tamién bell equipo d’o Sur de Francia. Manimenos a la fin no podioron venir-ie por causas economicas. Tamién plegoron en Zaragoza bells “mercs” u chugadors mercenarios, que son chugadors d’atros equipos, pero que chugan como chugadors libres a o millor postor.

A copa se chugó o dominche 21 pasau en o Estadio Miralbueno- El Olivar, a on a las 10 d’o maitin plegoron os Barcelona Eagles, os Bizkaia Boggarts, os Nightmare Grims de Tarragona y prou que si os Imperius Zaragoza.

Belunos ya se conoixeban d’atros partius y competicions y estió como veyer a antigos amigos.

Dimpués d’aprestar o campo de chuego, a las 11:00 d’o maitin prencipiaba o primer chuego, os Bizkaia Boggarts contra Imperius Zaragoza, ganando os vascos y dimpués os Grims chugoron contra os Eagles, ganando os barceloneses.

Dimpués de bells chuegos ta entrenar, tornó a competición con os Boggarts contra os Grims, ganando os vascos.

Antes de chentar pertocó atra vegada a os aragoneses que chugoron contra os Barcelona Eagles, ganando istos.

Dimpués de chentar y de descansar-se una mica, os equipos tornoron a chugar y plegó uno d’os partius más intresants, chugando dos d’os equipos mas fuertes y importants de tot o Estau. Os Boggarts (subcampions d’a Copa de Espanya) y os Eagles (Campions d’a Liga Catalana) facioron un gran partiu que amenistó prórroga ta decidir o ganador, que estioron os barceloneses.

A Copa remató con un chuego entre os Grims y os Imperius, ganando o equipo de Tarragona.

Dimpués d’isto se fació a entrega de medallas a os chugadors y chugadoras importans, asinas como a Copa (plena de fruitas d’Aragón) a os campions, os Barcelona Eagles. Se facioron fotos y mesmo bi habió bella glarimeta, pero o mas important dillá d’o puesto en a Copa estió o buen ambient que bi habió tot o diya entre tot o mundo.

Carlos Mainz Escartín

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.