Quince lugars no tendrán primer ciclo de secundaria en os colechios suyos l’anyo venient

Vintiueito lugars sí que conservarán os dos cursos, por agora, dimpués de qualques meses de protestas y movilizacions

Acto en Broto, en esfensa d'a remanencia d'a ESO (Foto: esoenbroto.org)

Acto en Broto, en esfensa d’a remanencia d’a ESO (Foto: esoenbroto.org)

O conflicto sobre o mantenimiento d’o primer ciclo de secundaria (1º y 2º d’ESO) en os colechios rural dió ahiere un nuevo trango, en anunciar Dolores Serrat, consellera d’Educación, a decisión final sobre en qué lugars continarían fendo-se as clases d’istos cursos y en quals no. Quince lugars perderán o curso venient o primer ciclo y l’alumnalla d’istos libels habrá de marchar ta institutos d’atros lugars u ciudatz amanadas. Vintiueito, manimenos, conservarán os dos cursos por agora.

Serrat lo anunció iste miercols en una reunión con as AMPAS d’os colechios de primaria d’a provincia de Teruel. En ixa provincia Montalbán, Archent, Camanyas, Fuents Calients, Galv, Pancrudo, Visiedo, Fridas d’Albarrazín, Griegos, Guadalaviar, Villar d’el Cobo, Mosqueruela, Puertomingalvo, Val de Linars, Camariellas, Pitarc, Villar Luengo, Lo Pobo, Villarroya de los Pinars, Bronchals, Oriuela  y Albalat de l’Arcebispe, continarán impartindo o primer ciclo en os centros de primaria. L’alumnalla de Cedriellas, Aliaga, Cuevas d’Almudén, Finollosa d’Exarc, Perals, Muniesa, Castellot, Las Cuevas de Canyart, Tramacastiella y Royuela, manimenos, sí que habrá de mover-se ta ir ta clase.

En a provincia de Uesca Broto, Ansó, Echo, Campo, Ayerbe y Zaidín continarán con os dos cursos, entre que Gurrea de Galligo, Tardienta, Boltanya, Benavarri y Alcorricón los pierden. En Zaragoza no bi heba garra población que continase impartindo clases de 1er y 2º d’ESO en colechios.

A situación yera excepcional, como ha remerau a consellera, ya que seguntes a normativa espanyola d’educación, a partir d’a secundaria, as clases s’han de fer en institutos y no pas en centros de primaria. Manimenos, a situación demografica aragonesa fació que mientres deciseis anyadas, istos dos libels continasen fendo-se en muitos lugars en os colechios ta privar de fer mover-se a tanta alumnalla enta atros lugars, a soben aluenyaus y con malas comunicacions.

L’anuncio fa meses d’a consellería de cambiar ista situación, fació movilizar-se a muitos d’istos lugars ta esfender que continasen as clases en os suyos municipios. Dimpués de negociacions, protestas y movilizacions, beluns d’istos lugars celebran poder continar una anyada más tenendo a la zaragalla estudiando en o suyo lugar, entre que atros habrán d’apanyar-se-las l’anyo venient ta que puedan asistir t’as clases.

Os criterios d’a consellería ta esleixir que lugar continarían tenendo o primer ciclo d’ESO yera que no tenesen instituto proximo, que tenesen l’instituto de referencia a más d’una hora de viache u que tenesen un gran numer d’alumnos, que s’ha establiu en 15 ta cadagín d’os dos cursos de 1º y 2º d’ESO.

 

Una rispuesta a Quince lugars no tendrán primer ciclo de secundaria en os colechios suyos l’anyo venient

  1. Plataforma en Esfensa de que uns OVNIs Abduzcan a Serrat

    Qué penible que no i haiga diners pa educación, pero si pa empentar curtometraches antiabortistas!!!
    Manimenos no plego a entender porque a chent no sale t’as carreras pa rematar con ista chentota d’una maldada vegada!
    Fastio me fa la DchA

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.