Rajoy anuncia un retalle de 16.500 millons d’euros

O discurso d'investidura de Rajoy ha serviu ta concretar, a la fin, as midas d'o suyo gubierno

Mariano Rajoy ha feito o suyo discurso d’investidura (PDF), alazetau en as reformas economicas. As primeras midas estarán a lei d’estabilidat presupuestaria, os presupuestos de l’anyo venient y esviellar as pensions. L’obchectivo ye retallar 16.500 millons d’euros.

O suyo equipe ha pasau tamién un resumen d’as midas que ferá o suyo gubierno (PDF). Se redimensionará o sector publico, se ferán nuevas formas de chestión ta las televisións publicas, se mirará de viedar as prechubilacions. Tamién se restructurarán os festivos, ta privar de fer puent, fueras d’as que ha denominau “fiestas de arraigo popular”.

A reforma laboral tamién será un d’os obchectivos d’a lechislatura, con a revisión d’a negociación colectiva y os dreitos de formación.

A restructuración financiera será un primer borrador que s’enamplará más entabant. Se recupera a deducción por vivienda, se reformará l’IVA ta favoreixer a las PYMES y Autonomos.

Tamién proposara una nueva ola de restructuracion bancaria, con nuevas fusions y s’esviellarán o mas luego posible as institucion de l’estau, como o Tribunal Constitucional.

Sobre o sistema educativo ha anunciau un Bachillerato de tres anyos y enamplar a educación bilingüe espanyol-anglés, y a trilingüe en as comunidatz con luenga oficial, que no ye lo caso d’Aragón.

O vocero d’o PSOE, Pérez Rubalcaba ha dito que ferán una oposición responsable ta aduyar a o gubierno espanyol a salir d’a crisi. Pérez Rubalcaba, manimenos, ha demandau a Rajoy que especifique como retallaran ixos 16.500 millons d’euros. Rubalcaba amás, ha dito que veilarán por os dreitos socials y bienestar d’os ciudadans, asinas como a reforma laboral u a reforma d’as institucions, en que s’ha amostrau con voluntat de plegar en alcuerdo.

Con un discurso centrau en as midas economicas y en o desembolique catalán, Josep Antoni Duran i Lleida ha asegurau en o suyo parlament que “Espanya fa más pobre a Catalunya”. Duran i Lleida ha demandau un pacto fiscal entre Espanya i Catalunya ta que a Generalitat pueda recullir o 100% d’os impuestos d’os suyos ciudadans. Como en atras partis d’o diyas, Rajoy s’ha negau a fer concesions a las comunidatz, dicindo que l’important ye l’emplego y salir d’a crisi, y que ixo ye bueno ta totz “fueras de particularismos”.

O diputau de Chunta Aragonesista-La Izquierda de Aragón, Chesús Yuste, ha centrau a suya intervención en Aragón y ha reclamau a Rajoy actuacions concretas en infraestructuras (N-II, N-232, Canfranc…), amás ha pediu a Rajoy que diga si ferá o trescole de l’Ebro, u no pas. En a suya intervención, Yuste, tamién ha emplegau una mazada en aragonés que s’ha sentiu asinas por primer vegada en o Congreso espanyol “U pleverá u nevará, u ferá un tiempo u atro”.

En a mesma colla parlamentaria, o cordinador d’IU, Cayo Lara, ha alertau que s’enampla a desigualdat en Espanya y ha demandau un dialogo serio, luén de politicas neoliberals.

Rosa Díez, d’UPyD, ha reclamau un estau federal pero que siga marcau por as necesidatz federals y no particulars, y ha reclamau “ambición de país y patriotismo constitucional”.

Por l’inte, nomás o Foro por Asturias ha dito que refirmará a Rajoy en a investidura.

En a sesión d’o martes, PNV y PP han dito que cal ser pruden ta consolidar a paz en o País Vasco. Josu Erkoreka, vocero d’o PNV ha demandau una politica de garcholas más flexible. Rajoy, que ha dito coincidir en l’anviesta economica con o PNV ha asegurau que ETA no ye rematada y que dica que no se disuelva, encara habrá d’aplicar-se tota la legalidat.

Más duro ha estau Rajoy con Amaiur. O suyo vocero Iñaki Antigüedad, ha refirmau a suya voluntad de plegar t’alcuerdos y de dar trangos enta una paz definitiva, pero Mariano Rajoy ha dito que s’aplicará la lei, y que no puede reclamar-li cosa. Amás, ha demandau a Antigüedad que contine desichindo a fin d’ETA a la banda.

A resta de partius d’a colla parlamentaria mixta han amostrau o suyo malestar por a composición d’o mesmo que lis vieda d’emplegar más tiempo. O valencian Joan Valdoví ha quiesto achuntar a Rajoy con a corrupción en o País Valenciano, mientres que Rajoy ha dito que si os valencians votan PP será por bella cosa. Dende o BNG y Geroa Bai s’ha criticau a situgación en que queda Europa y l’estau espanyol con o control francés y aleman, encara que Rajoy ha feito saper que no ye chuzmeso a las decisions de Merkel u Sarkozy.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.