Rajoy y Rubalcaba, en Zaragoza

Rajoy ha sinyau con Biel o pacto ta que PP y PAR se presenten chuntos a las eleccions d'o 20-N

Os dos prencipals candidatos a presidir Espanya a partir de noviembre son estaus en Zaragoza. O president d’o PP, Mariano Rajoy ha aproveitau o viache ta sinyar o pacto con o PAR, mientres que o candidato socialista, Alfredo Pérez Rubalcaba, ha vesitau bellas interpresas de Zaragoza y ha feito un acto preelectoral d’o PSOE.

Rajoy, Rudi y Biel

Rajoy, Rudi y Biel

A imachen d’a chornada en a dreita aragonesa ha estau a sinyatura d’o pacto electoral dentre os socios de gubierno, PP y PAR. Feba anyos que os dos partius no presentaban candidaturas de conchunta, como si ferán o venient 20 de noviembre. Ta president d’os conservadors espanyols, Mariano Rajoy, o pacto sirve ta sumar voluntatz, dillá d’as esferencias particulars ta amillorar a situgación economica. O líder d’o PP ha dito que a voluntat d’o suyo partiu ye creyar empleo y que ta ixo l’alianza con o PAR ye muit important.

José Ángel Biel ha quiesto remarcar que o pacto fa que Aragón tienga más peso en Espanya, más que más en o Senau espanyol. Mientres que en as candidaturas a o Congreso a presencia d’o PAR estará testimonial, en as d’o Senau partiran en os puestos posibles de salida en as tres circunscripcions. Biel aspera conseguir tres senadors rechionalistas en as eleccions de noviembre.

A presidenta d’o PP aragonés y d’Aragón ha esplanicau que ha estau facil achustar-se con o PAR, encara que ixo no quiere dicir que s’enample o pacto de gubernabilidat d’o pais que os dos partius mantienen.

No se conoixe guaire cosa d’o programa pactau, pero tanto Rudi como Biel, han sinyalau que as infraestructuras tendran a-saber-la importancia.

Rubalcaba en l'acto de tardis en Zaragoza

Rubalcaba en l'acto de tardis en Zaragoza

Mientres, tamién en a capital, o candidato socialista, Alfredo Pérez Rubalcaba ha vesitau Pla-za. Rubalcaba ha asegurau que ta las interpresas lochisticas os dos prochectos de corredor, o Mediterranio y o Central, son alacetals y “compatibles”. O candidato socialista ha feito una achuga por a innovación y a exportación como claus ta salir d’a crisi.

Ya de tardis, y alcompanyau por a plana mayor socialista aragonesa y o secretaire d’organización d’o socialismo espanyol, Marcelino Iglesias, Rubalcaba ha protagonizau un acto pre-electoral con muito publico en o Palacio de Congresos de Zaragoza. Rubalcaba ha quiesto risponder a las midas que Rajoy anuncio ixatro diya ta favoreixer a contratación y ha dito que si gubierna, emplegará os diners publicos t’aduyar a os interpresaires. Ta aconseguir ixos diners ha dito que recurrirá a os bancos y a os grans patrimonios que ha dito que han de aduyar agora que as cosas van mal.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.