Rasquera vota sí a la plantación de mariguana

O lugar de Rasquera (Tarragona) con un 56,3% d'os votos a favor d'un cultivo de mariguana en o municipio

Bernat Pellissa, alcalde de Rasquera

Os ciudadanos de Rasquera (Ribera d’Ebre) han votau mayoritariament a favor de permitir cultivar en o municipio una plantación de mariguana t’os cinco mil socios d’o club de fumadors Associació Barcelonina Cannàbica de Autoconsum (ABCDA). I han votau a favor 308 electors; 239 se i han oposau y bi ha habiu 7 votos nulos. Isto quiere decir un 56,3% de votos favorables, que no plegan a o minimo d’o 75% que heba fixau l’alcalde, Bernat Pellissa, que heba dito que dimitiría si no s’arrivaba a iste porcentache de votos favorables. Hue, manimenos, se’n ha desdito y no dimitirá.

Pellissa ya renunció en o suyo partiu, ERC, y en o suyo puesto en o Consello Comarcal de Ribera d’Ebre, ta tener asinas plena libertat ta empentar o prochecto.

O concello, que esfiende a viabilidat churidica d’a plantación, preveye creyar quaranta puestos de treballo y ganar dica 1,3 millons d’euros en dos anyos, que destinará a bosar as deudas que tien o municipio y a empentar l’actividat economica.

O plan d’o concello

O plan d’acción municipal anticrisi 2012 incluye a constitución d’a interpresa publica ‘Rasquerana de Recerca i Interpretació’ d’a variedat vechetal ‘Cannabis sativa’, que habría de desembolicar un programa d’ordenación, planificación y chestión ta supervisar o prochecto.

Entre as atribucions ye l’estableiximiento d’una mesa de veixilancia que desembolicará os protocols de seguridat y prevención de risques, amás d’empentar a investigación d’o cannabis y os efectos que tien.

Amás, o plan preveye que i haiga un banco de tierras ta que os propietarios de fincas bi intresaus puedan ufrir a o concello o dreito d’emplego privativo y d’explotación, y una bolsa de treballo.

Reaccions confrontadas

A fiscalía de Tarragona ha ubierto dilichencias informativas y analiza si ye posible churidicament iste prochecto. Mientres s’aspera l’informe finitivo, o fiscal en chefe de Tarragona, Xavier Jou, ya ha abanzau que creye que o consumo colectivo de cannabis no ye delicto si no i hai risques ta tercers.

Jou diz que a legalidat pende de que o consumo siga ta un grupo reduciu, que se realice en un puesto zarrau, que s’asegure que as substancias no las consumen personas adictas y que o consumo siga decamín.

O Consello Comarcal, en cambio, no quiere o prochecto porque ‘s’aleixa d’as valuras eticas y morals d’una sociedat que amenista o treballo, l’esfuerzo, a constancia y a perseverancia ta salir d’a situación de crisi global que pate.’

A vicepresidenta d’o gubierno, Joana Ortega, aseguró que no veyeba que aprebando iste prochecto estase a solución t’a reactivación economica y a salida d’a crisi t’o lugar. O consellero d’Interior, Felip Puig, considera que a iniciativa ye de ‘dubdosa legalidat’ y, de feito, os mossos han manteniu a presión sobre l’ABCDA arrestando-ne fa poco una treballadora, que quedó en libertat.

Y a delegada d’o gubierno espanyol, María de les Llanos de Luna, abanzó que solicitaría toda la documentación relativa a o prochecto.

Fuent: http://www.vilaweb.cat/noticia/4001550/20120410/rasquera-vota-plantacio-marihuana.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.