Reabre o tramo de tren entre Olorón y Bedous

Unatro paso mas dica a buega con Aragón

O tramo de linia ferria entre as localidatz francesas de Olorón y Bedous ha estau reabierto iste maitín. En a devantadera han estau presents numerosas personalidatz aragonesas como o president d’a comunidat, Javier Lambán; o consellero de Mobilidat, José Luis Soro; l’alcalde de Zaragoza, Pedro Santisteve u os alcaldes de Canfranc y Chaca. Por o costau francés a representación ha estau presidida por o president d’a rechión d’Aquitania, Alain Roussett, entre atros. O nuevo tramo deixa a linia ferria a poco mas de 30 kilometros d’a buega con Aragón y a connexión con Canfranc.

Ista unión ferroviaria entre Aragón y Francia leva zarrada dende 1970. O nuevo tramo situau en a Val de l’Aspe ha estau aprofitau por as autoridatz d’Aragón y Aquitania ta expresar o suyo deseyo de revertir dita situación.

A reobridura ye o fruito de dos anyos de treballos en a linia que han teniu una valor de 102 millons y han estau sufragaus por o Gubierno d’Aquitania. O resultau ye un trayecto de 25 kilometros de distancia en el qual os trens pueden circular a una velocidat de 80 kilometros por hora de meya. En o recorriu se crucean 17 pasos a ran, 31 puents ferroviarios y numerosos tuneles.

O president d’Aragón ha definiu a chornada como “historica t’a sociedat aragonesa que dende fa decenios sonea con a reobridura d’o Canfranc y que siempre habremos de dar as gracias a o president d’Aquitania”. Por isto Lambán ha afirmau que “suposa un reto t’a resta d’administracions” y que “a partir d’agora no tiene sincusa ni a DGA, ni o Gubierno d’Espanya ni a UE ta no secundar o magnifico esfuerzo feito por o president Roussett”.

Por a suya parte l’alcalde de Zaragoza ha sinyalau “que os municipios queremos sumar-nos a iste esfuerzo con unas chornadas que se celebrarán o 23 de setiembre en el qual totz os municipios que son en a linia de Valencia a Canfranc sían presents y a cumbre hispano-francesa meta en a UE ista prioridat”. Santisteve ha considerau que “ta una ciudat como Zaragoza ye imprescindible que a buega sía permeable” por motivos tanto culturals como economicos y ha meso como eixemplo d’istes zaguers Plaza.

O consellero de de Vertebración d’o Territorio, Mobilidat y Vivienda, José Luis Soro, ha qualificau o día “como de celebración pero que si queremos seguir abanzando hemos de convencer a París, a Madrit y a Bruselas que Canfranc no ye solament una qüestión d’Aquitania u d’Aragón sino que ye una qüestión de vertebración europea”.

Dende Podemos han acudiu quantos representants ise d’os actos oficials. O deputau autonomico Nacho Escartín ha valorau que “por a parte francesa ye un paso important pero que por a parte aragonesa no veyemos muito compromiso de momento. Veyemos una operación urbanistica en a estación de Canfranc y veyemos con preocupación a continuidat d’o gubierno d’o Partiu Popular que continará bloquiando a financiación que fa falta realment ta fer a parte aragonesa”.

O recientment retrigau deputau por Podemos en a provincia de Uesca Jorge Luis Bail ha recordau que dende o suyo grupo ya presentoron iniciativas t’a reobridura d’o Canfranc a lechislatura pasada y que tornarán a presentar-las en a siguient porque consideran que ye un prochecto d’Estau. Y ha adhibiu que como as competencias son en o Gubierno Central ye d’iste d’o que debe recibir fondos de conchunta con a Unión Europea.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.