Rajoy fa un clamamiento ta “entre totz” salir d’a crisi

O candidato popular clama a tornar l'argüello de "ser espanyol"

O ganador d’as eleccions espanyolas, Mariano Rajoy, que ha quitau a mas gran mayoria absoluta d’o PP, ha feito un clamamiento ta fer d’Espanya “atra vegada, una gran nación” que recupere o suyo puesto en Europa. Rajoy ha dito que gubernará ta totz y que os suyos enemigos seran “l’ature, a crisis de deuda y o deficit”. Mientres fuera l’asperaban muitos siguidors con banderas d’Espanya y d’o PP, Rajoy ha feito un discurso muit institucional apelando a la diversidat d’Espanya, pero tamién a la solidaridat. Rajoy ha afirmau que quiere ser o president de “totz os espanyols”.

En Ferraz en a capital d’Espanya, Alfredo Pérez Rubalcaba ha acceptau haber perdiu as eleccions, con os piors risultaus d’o PSOE dende a restauración d’a democracia. Rubalcaba ha gritau a Rajoy ta felicitar-li por os risultaus. O candidato socialista tamién ha dito que o PSOE habrá de fer un congreso ta estudear as esferents opcions y ha ufriu o triballo d’o PSOE ta salir d’a crisi y esfender os servicios publicos alazetals.

En a Izquierda d’Aragón, o deputau electo Chesús Yuste, ha dito recullir o testigo de Labordeta y José Luis Martínez, y ha asegurau que “complirán o suyo compromiso en a esfensa de l’emplego y os servicios publicos”.

A candidata socialista por Aragón, Pilar Alegría, ha felicitau a o PP, y ha dito que l’han feito plegar a suya “colaboración ta salir d’a crisi, pero que o PSOE tien as suyas linias royas”.

En o PP d’Aragón, o goyo yera bien veyible, o candidato Eloy Suárez ha quiesto remerar a Manuel Giménez Abad, asesinau por ETA, y tamién ha esplanicau que maitín mesmo prencipiaran a triballar ta tornar l’esfuerzo a os votants.

2 Rispuestas a Rajoy fa un clamamiento ta “entre totz” salir d’a crisi

  1. Hibo que ran d’aragonés…

  2. Felicidatz a arredol por a cobertura d’as esleccions, que siga ista a primera de muitas!!!

Deja un comentario

Tu dirección de correo electrónico no será publicada. Los campos necesarios están marcados *

Connect with Facebook

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.