Reclaman a o Gubierno d’Aragón una posición “valient” pa Tata

Contina o conflicto en a factoría de Tata Hispano en Zaragoza a on 287 treballadors y treballadoras son afectaus d'un ERE d'extinción

Foto: Arainfo

Foto: Arainfo

O grupo parlamentario d’IU Aragón tresladará a o Pleno d’as Cortz d’iste chueves a situación de conflicto laboral d’os 287 treballadors y treballadoras d’a factoría de Tata Hispano en Zaragoza, o que tien o comité d’interpresa negociando con a dirección un ERE d’extinción pa toda a plantilla, dimpués de l’anuncio d’o zarre d’a planta que realizoron os propietarios de Tata Hispano Motors SA.

Debant d’ista situación “inchusta” pa os treballadors, Luis Ángel Romero, portavoz d’Industria d’IU en as Cortz, defenderá en a sesión plenaria una Proposición no de Lei en que o suyo grupo parlamentario pide, en primer puesto, a las Cortz d’Aragón que manifiesten a suya preocupación por o zarre d’ista factoría y amuestren a suya solidaridat con a plantilla.

“Os representants d’istes treballadors y treballadoras vienen denunciando, dende fa tiempo, a mala chestión d’a dirección y a incapacidat de buscar alternativas a o zarre y, paralelament, dende as institucions publicas s’ha reclamau o mantenimiento d’actividat y de l’emplego”, recuerda Romero. “A nuestra iniciativa –contina- amás de centrar-se en o conflicto laboral, se centra en l’important impacto social y economico que representa ista factoría en Aragón”.

Asinas, IU insta a o Gubierno d’Aragón a negociar con a dirección de Tata un alcuerdo que permita de ceder de gufanya a las y os treballadors as instalacions, os medios de producción y o Know-How; adquirindo o compromís de, transitoriament, cooperar con totz os suyos medios, incluius os economicos, en o mantenimiento de l’actividat y l’emplego d’ista planta dica a constitución y rodache d’a formula churidica esleida por os treballadors pa responsabilizar-se d’ista factoría y continar en o futuro. En o segundo punto d’a iniciativa, IU reclama a l’Executivo que faiga servir totz os medios que tienga a o suyo alcance pa propiciar que ista factoría conte con carga de treballo en iste nuevo proceso.

Movilizacions contra o zarre

A plantilla, que mantiene o calandario de movilizacions organizau pa protestar por o zarre d’a factoría, ha convocau una concentración maitín, 23 d’octubre, 19.30 horas frent a o Concello de Zaragoza.

En iste sentiu Izquierda Unida “respalda y ofreixe tot o refirme a la plantilla si deciden a implantación d’un modelo ya experimentau en a interpresa entre os anyos 80 y 90, como ye a formación d’una sociedat anonima laboral u una cooperativa chestionada por os treballadors”. Tal como explica Raúl Ariza, Responsable d’Industria d’IU Aragón, “existen experiencias exitosas como a realizada en a planta carrocera de Sunsundegui, en Alsasua (Nabarra), a on con refirme publico y l’empente d’a plantilla s’aconsiguió de quitar entabant a companyía, con una nueva formula de chestión”.

Fuent: http://arainfo.org/2013/10/reclaman-al-gobierno-de-aragon-una-posicion-valiente-para-tata/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.