Reclaman o cumplimiento d’o convenio ferroviario entre o Gubierno d’Aragón y Renfe

O PP ha refusau a comparecencia a demanda de Chesús Yuste d'Ana Pastor, ministra de Fomento, pa que explique os incumplimientos d'o convenio entre Renfe y a DGA

800px-596_de_Renfe_en_CanfrancDebant d’os incumplimientos por parte de Renfe d’o convenio ferroviario con a DGA, Chesús Yuste, diputau de CHA, ha demandau en a Diputación Permanent d’o Congreso d’os Diputaus a comparecencia d’a ministra de Fomento, Ana Pastor, pa que explique os incumplimientos de Renfe, tanto en horarios y servicios como por a presencia d’os trens mas viellos de l’Estau. Manimenos, o PP ha refusau que a ministra comparezca.

Dende que entró en vigor o nuevo convenio, que costará 13 millons d’euros a las arcas aragonesas, Renfe no ha respectau os horarios y ha substituiu trens por atros mas viellos ya retiraus d’o servicio, o que ha chenerau una estrolipada de queixas d’usuarios por a falta d’información y a perda de calidat en o servicio. Renfe alega problemas tecnicos.

Roberto Bermúdez de Castro, consellero de Presidencia y Chusticia d’o Gubierno d’Aragón declaró que “nusatros ibanos a pagar relichiosament 13 millons” pero si o convenio no se realiza “ya viyeremos tot plegando en ixe punto”. Entremistanto, en Fomento, as parolas d’o consellero aragonés estioron calificadas como “inacceptables”. Renfe y o Ministerio de Fomento nomás admiten incumplimientos menors en horarios en dos linias y demandan paciencia pa achustar-lo tot.

As bicicletas pagan 3,20 euros extra por ir en trens de media distancia

Os viachers que quieran ir con a suya bicicleta en os trens de media distancia han de pagar 3,20 €, un servicio que dica agora yera de gufanya. Renfe prenió ista mida de bote y boleyo o mierques sin avisar a os usuarios, mesmo os treballadors d’a companyía conoixoron a mida mediant una circular interna o mesmo diya. A mida ha estau presa de traza tant improvisada que mesmo en os billetz en cuenta de bicicleta mete “animal domestico”. Agora que, esquís u palos de golf pueden estar transportaus sin pagar pon.

Os usuarios y usuarias d’a bicicleta critican a mida. Dende o Colectivo Pedalea se considera ista decisión como “contra a bici“, podendo estar un fren pa lo cicloturismo, o qual tamién repercute en a economía d’as zonas rurals. Dende iste colectivo ciclista se queixan d’o maltracto que siempre s’ha dau a la intermodalidat tren y bici debiu a las estrictas normas de transporte de bicicletas en os trens, y consideran que “amás de dar un servicio penible, fan pagar por puyar-ie con una bicicleta“.

En a resta de trens, cercanías y larga distancia, transportar bicicletas ye de gufanya, encara que en o caso de larga distancia (a on antes no podeban viachar bicicletas) han d’estar desmontadas u plegadas y ficadas en una funda que no puede exceder unas ciertas dimensions, o qual dificulta o transporte d’as mesmas. Manimenos, en a resta d’Europa, ista intermodalidat ye normal y cutiana, amás de contar con un servicio ferroviario con millors condicions pa fer-lo y unas normas a-saber-las mas tolerants.

Una rispuesta a Reclaman o cumplimiento d’o convenio ferroviario entre o Gubierno d’Aragón y Renfe

  1. Pingback: Reclaman o cumplimiento d’o convenio ferroviario entre o Gubierno d’Aragón y Renfe | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.