Recuperau un libro d’a Biblioteca Lastanosa

L'IEA ha mercau l'eixemplar por 1500 euros

L’Instituto de Estudios Altoaragoneses d’a DPH ha adquiriu un eixemplar magnificament conservau d’o libro que Salvador Ardevines Isla, un medico natural d’a localidat de Luna, publicó en Madrid en 1621 con o títol Fábrica universal y admirable de la composición del mundo mayor, donde se trata desde Dios hasta nada, y del menor, que es el hombre. L’eixemplar resulta interesant por quantos motivos, entre ells que fizo parti d’a biblioteca que Vincencio Juan de Lastanosa aplegó en o suyo palau d’o Coso Alto, en a Uesca d’o sieglo XVII, ciudat ta la que agora torna definitivament. Lo libro incluye l’exlibris imprentau que o mecenas uescano ficaba en as obras que adquiriba, an que se leye: De la Biblioteca de Vincencio de Lastanosa, caballero infanzón, ciudadano de Huesca y señor de Figueruelas.

En as suyas pachinas, Lastanosa chuslinyó y anotó los datos y noticias que más li interesoron. Y a la fin d’o volumen escribió, con a letra suyiza: Leílo a 9 de setiembre del año 1649. 2.ª vez. Iste libro tamién figura en o catalogo d’as obras que integraban a biblioteca lastanosina, conservau actualment en Estocolmo. Salvador Ardevines, un medico aragonés, lo retrato d’o qual amaneixe en un gravau en o libro, no publicó soque ista obra, d’a que n’existiba unicament un eixemplar en Aragón, en a Biblioteca Universitaria de Zaragoza, y que no contaba con portalada y teneba os preliminars estortecaus. Lo que se conserva dende agora en o Instituto de Estudios d’a Diputación de Uesca destaca, por cuentra, por trobar-se completo y en un fabuloso estau de conservación. L’IEA lo ha adquiriu por 1500 euros.

Iste libro de 1621 destaca por aplegar quantos episodios singulars que se localizan en Uesca y en o conchunto d’Aragón. Entre atros, lo follet que tanyió en l’anyo 1601 l’organo d’a ilesia de Santa María in Foris, a las veces convento agostino, a restauración d’o qual viene de rematar a Diputación Provincial de Uesca; os ruidos grandes y espantables que despobloron o lugar de Marcuello; u diversos casos de mullers acusadas de bruixas, incluita una a qui aplicoron un ingüento machico que deciba poseyer, ta comprebar os suyos efectos. Lo texto d’o libro puede leyer-se y descargar-se en o siguient vinclo: http://books.google.es/books?id=a31FGtfRZhoC&printsec=frontcover&hl=es#v=onepage&q&f=false

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.