Referendum express ta mantener a convocatoria de setiembre en a Universidat

O 9 d'abril os alumnos y alumnas d'a Universidat de Zaragoza podrán decidir sin mantienen a convocatoria de setiembre u no pas

Dentrada d'a Universidat de Zaragoza (Foto: Wikpiedia)

Dentrada d’a Universidat de Zaragoza (Foto: Wikpiedia)

Iste setiembre podría estar o zaguer con examens en a universidat aragonesa, sino lo cambea o voto d’os estudiants o venient miercols 9 d’abril en un referendum convocau por a intstitución. Asinas les ne comunicoron iste pasau lunes a los colectivos d’estudiants dende o rectorau. O venient miercols, dende as 10:00 dica las 19:00 totz os centros universitarios contarán con urnas t’a que os más de 30.000 estudiants matriculaus puedan opinar sobre o calendario lectivo y o rechimen de convocatorias.

Dende a Universidat se proposa un calendario con dos convocatorias dimpués d’o primer cuatrimestre y atras dos dimpués d’o segundo. As prebas se ferían d’o 8 t’o 17 de chinero y d’o 26 de chinero t’o 6 de febrer en o primer cuatrimestre y d’o 25 de mayo t’o 12 de chunio y d’o 22 de chunio t’o 3 de chulio, en o segundo. L’alumnalla se quedaría asinas sin a posibilidat de aprofeitar lo verano ta estudiar t’os examens de setiembre.

Iste calendario se someterá o miercols 9 de abril a un referendum a on que podrán votar totz os alumnos y alumnas matriculaus en a universidat. Manimenos, ta que siga valido, a Universidat imposa dos condicions: caldrá que i participe a lo menos un 30 % de l’alumnalla (más de 9.000 alumnos) y caldrá que bi haiga un 60 % de votos en contra d’a propuesta de calendario que fa la Universidat de Zaragoza.

Ixas condicions son una d’as queixas que han teniu os coletivos y sindicatos estudiantils, qui las consideran masiau furas. D’una man, en as convocatorias electorals d’a universidat de Zaragoza no gosa participar-ie que un 10 % de l’alumnalla, por lo que caldría triplicar a cifra. D’atra man tamién plegan queixas por a radida semana de campanya que se podrá fer. Encara que feba meses que se charraba d’a posibilidat d’o referendum, os representants estudiantils no lo han sabiu a fe que dende o luns, con tasament 8 diyas ta informar a los estudiants.

Si no se conseguise vulcar a propuesta d’a Universidat, o calendario se levaría t’o Consello de Gubierno, organo que previsiblement aprebaría iste calendario.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.