Reino Uniu y Estaus Unius se paran pa una posible intervención militar internacional en Siria

Estaus Unius y o Reino Uniu se paran debant d'un posible ataque contra Siria. Os inspectors d'a ONU que investigan o supuesto ataque quimico continan treballando

Soldau sirio en Damasco. Foto: Elizabeth Arrot/Voice of America (Dominio público)

Soldau sirio en Damasco. Foto: Elizabeth Arrot/Voice of America (Dominio público)

O Reino Uniu para as suyas fuerzas armadas pa un posible ataque militar contra Siria como respuesta a o supuesto ataque quimico d’o que acusan a o gubierno sirio. L’ataque mesmo podría producir-se antes que saber-se os resultaus d’a misión d’a ONU que investiga o caso. Cameron ye en conversacions con atros liders internacionals a fin d’adoptar una respuesta proporcionada y ha declarau que l’ataque “s’achustará a la lechislación internacional“. Tanimientres, o Primer Ministro ye presionau por diputaus de totz os partius britanicos pa que se discuta sobre iste afer en o Parlamento.

Os Estaus Unius mediant o suyo Secretaire d’Estau, John Kerry, afirman que no tienen dandalos sobre l’emplego d’armas quimicas contra a población por parte d’o gubierno sirio y que debe responder por ixo. Os Estaus Unius son tamién parlando con os suyos aliaus sobre a posibilidat d’un ataque contra Siria, que podría estar imminent y sin o refirme d’o Consello de Seguridat d’a ONU debiu a la oposición de Rusia y China, que i tienen poder de veto.

Os inspectors d’a ONU continan con a investigación

Os inspectors d’a ONU que ahiere buscaban prebas de l’emplego d’armas quimicas en l’ataque d’o pasau mierques 21, dicen haber trobau “evidencias valiosas” d’ixo. Antes de poder replegar istas prebas, estioron tiroteyaus por francotiradors sin identificar tot indo t’o suburbio de Damasco a on se produció o supuesto ataque quimico. Visitoron dos hespitals amás de consiguir testimonios de medicos y supervivients y muestras que se son analisando. Manimenos, a investigación podría deixar sin saber quál d’os bandos en conflicto realizó l’ataque.

Carla del Ponte, miembro d’a Comisión Internacional d’Investigación Independient d’a ONU en Siria estableixida dende 2011 pa examinar violacions de dreitos humanos en o conflicto, sinyala como autors de l’ataque a os “rebeldes” sirios, que podrían haber feito servir gas sarín, seguntes publica The Washington Times. A oficial d’a ONU sinyala que no i hai prebas definitivas pero sí grans sospeitas de que os rebeldes podrían haber feito servir ista acción pa embrecar-ie a o gubierno de Bashar al-Assad.

Asinas mesmo, o lider kurdo Salih Muslim ha declarau que o President sirio Bashar al-Assad “no ye tant calabacero” como pa atacar a o pueblo con armas quimicas, considerando que “no ye tant desesperau como pa fer servir iste armamento” y que “no las fería servir amán de Damasco, a cinco kilometros d’a on un comité d’a ONU investiga l’emplego d’armas quimicas“. O Ministro d’Afers Exteriors sirio, Walid al Mualem, ha retau a la comunidat internacional a presentar qualsiquier preba de l’emplego d’armas quimicas por parte de l’exercito sirio.

Entremistanto, o President ruso Vladimir Putin en una conversación telefonica con o Primer Ministro britanico, David Cameron, ha dito que “no i hai evidencias que ocurrise un ataque con armas quimicas ni de quí en sería responsable“, seguntes informa l’achencia AFP. Rusia chunto a China y países como Irán, Venezuela, Cuba u Bolivia entre atros, s’oposan a una intervención armada contra Siria.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.