Remata o debat sobre l’estau d’Aragón en as Cortes

Mientres tres diyas s'han tractau os principals afers d'Aragón. Hue se presentan as proposas de resolución de man d'as collas parlamentarias

As Cortes mientres una d'as intervencions de Rudi (Foto: D.Ch.A)

As Cortes mientres una d’as intervencions de Rudi (Foto: D.Ch.A)

Iste viernes se fa a tercer y zaguer chornada d’o debat de politica cheneral que rematará con a presentación d’as proposas de resolución de man d’as collas parlamentarias. Rematan asinas tres diyas de debat politico en as Cortes d’Aragón mientres os que s’ha charrau d’a más gran parti d’os principals afers d’o país.

Se presentan un total de 312 proposas de resolución. 128 d’ixas proposas son presentadas por o PSOE, entre as que bi son un refirme a PLAZA, a Plataforma Lochistica de Zaragoza, una sobre a puyada d’impuestos t’as rentas mas grans u a demanda d’una renta minima t’os ciudadans. CHA en ha presentau 49 y IU 111. As dos formacions demandan a reprobación d’o gubierno de Rudi por haber malmeso l’estau d’o bienestar. Buena parti d’as proposas son endrezadas ent’a esfensa d’a educación y sanidat publicas y contra as retalladas que ye habendo-ie. PP y PAR os partius que refirman o gubierno presentan de conchunta 23 proposas. Antimás os rechionalistas en presentan atras seis en solitario entre as que demandan que o Gubierno d’Aragón desicha a lo d’Espanya inversions en estructuras.

O debat prencipió o pasau miercols con un charrazo de una hora y quarto d’a presidenta Luisa Fernanda Rudi, a on que esfendió a suya chestión mientres o tiempo que leva gubernando, en un contexto de crisi. Demando sacrificios a los ciudadans y esfendió as midas de ature d’o deficit ta construyir “una estructura que pueda durar muitas anyadas” debant d’un “sistema de bienestar con graus problemas”. Tamién dició esfender una “rebelión contra la resignación” y que caleba  “una nueva traza de mirar-se lo publico ta pasar d’un estau de bienestar a una sociedat de bienestar.”

O chueves estió o turno de respuesta d’as collas parlamentarias que composan as Cortes. Prencipió charrando Javier Lambán, portavoz d’o PSOE, qui acusó a lo gubierno d’estar una “delegación d’o gubierno espanyol” con a misión “d’apedecar o modelo social”. O charrazo continó con criticas a las midas presas por o gubierno espanyol y a la suya aplicación en Aragón. Acusó a Rudi de “albandonar a la suya suerte a los sector productivos y destruyir as asperanzas d’os lugars, fendo desapareixer os suyos plans de desembolique. En qüestions más concretas tamién acusó a Rudi de “irresponsabilidat por lo que han feito con PLAZA a on que no s’ha instalau garra interpresa” dende que prencipió l’actual gubierno. Ta rematar demandó más midas de refirme a la creyación de treballo, como un plan d’emplego choven y potenciar a participación ciudadana. A respuesta d’a presidenta estió un lurte de datos y a remeranza de l’herencio recibiu en os gubiernos d’Espanya y Aragón. L’inte polemico plegó quan, en respuesta a la demanda de Lambán de que a D.Ch.A. pagase a parti que le pertocaba d’o tramvia, Rudi respondió convidando-le a que o concello de Zaragoza pagase o canon de saneamiento, lo que bellas collas parlamentarias intrepretoron como chantache, cosa que Rudi negó dimpués.

O debat continó con Nieves Ibeas qui fació o suyo saludo en aragonés, catalán y luenga de sinyals, antimás de en castellano. En o suyo charrazo, que una parti se fació en aragonés, acusó a lo gubierno de “ fer servir a crisi como coartada ta fer a mayor involución autonomica d’a democracia espanyola”. y demandó a Luisa Fernanda Rudi que “sinye antis con antis l’alcuerdo bilateral economico-financiero con l’estau”. En respuesta a los sacrificios demandaus o diya d’antis, Ibeas aseguró que “no se demandan sacrificios, se imposan”. Tamién criticó l’austeridat esfendida por a presidenta “comprobando que no bi ha diners ta bellas cosas pero sí t’atras. No bi’n ha ta mantener o profesorau que cal en centros publicos, u ta pediatra en centros de salut u ta prochectos culturals, pero sí t’a escuela privada, exhibicions militars, compras de sinyals de guerra, actos de l’Opus Dei u ta pagar a publicidat de Dorna y MotoGP.”

En a respuesta de Luisa Fernanda Rudi, a presidenta esfendió a escuela privada concertada considerando-la “parti d’un mesmo rete d’escuelas refirmadas con fundos publicos” y a “libertat d’os pais ta trigar un centro seguntes o suyo ideyario”. Acusó a Ibeas dotze vegadas d’estar demagoga y se definió tan aragonesista como a diputada de CHA. Cuanto a las retalladas tornó a fer servir un listau de datos pleitiando con Ibeas por as ratios profesor alumnalla y reconoixió que no s’heba feito ni brenca ni meya en o teyatro Fleta porque bi heba atras prioridatz. Tamién esfendió con pasión a compra por 5000 euros d’un sinyal ta Guardia Civil ta un acto en honor a la suya patrona, a Virchen d’o Pilar que se ferá en Zaragoza. Tamién se concaró en a politica pirinenca. Debant d’un discurso más meyoambientalista, a presidenta esfendió, citando una anecdota personal con un pastor, o desembolique d’o sector d’a nieu y l’autopista electrica, ta que os habitadors podesen remanir-ie. Tampoco no estió d’alcuerdo con Ibeas sobre a suya anvista d’o dreito d’as mullers a decidir sobre a suya natalidat”.

Adolfo Barrena, portavoz de IU, prencipió a suya intervención fendo notar que a presidenta d’Aragón no heba dito ni una sola vegada a parola “treballador u treballadera”. Continó con un discurso centrau, más que más, en reinvindicacions cuanto a las relacions laborals. Denunció a perda de treballos en educación y sanidat y a que creye que bi habrá por a fusión d’as interpresas publicas Sodemasa y Sirasa. Cuanto a lo sector privau ufrió toda mena de datos de perdas d’emplego en muitas dembas. Respondendo a la esfensa d’a contención d’o deficit que heba feito Rudi, Barrena remeró que encara que “argumentan que o nuevo articlo 135 d’a Constitución, pactau por PP y PSOE, obliga a l’achuste y a retallada, no quieren saber mica de l’articlo 10 que declara inviolable o dreito a la dignidat d’a persona, ni d’o 41, que guarancia l’asistencia y as prestacions socials.·Mientres tot lo charrazo criticó o “ultra neoliberalismo d’a politicas d’o PP” y criticó, igual como Ibeas, o gasto feito en o sinyal d’a Guardia Civil, en Motorland u Aramón, en tiempo de retalladas.

En respondendo, a presidenta prencipió decindo que le “podeba haber respondiu de conchunta con CHA, pero que quereba respectar a tradición d’a Cambra contestando individualment”. Esfendió, dende o que estió un d’os debatz más ideyolochico d’a chornada o suyo liberalismo economico y enristió contra IU fendo servir as midas presas por o gubierno d’Andalucía, a on que ye a formación de cuchas, u o ERE planteyau por CC.OO. sindicato amanau a la coalición. A polemica plegó por os aplausos que adedicoron os parlamentarios d’o PP quan a presidenta charraba d’os 450 profesors forachitaus” contimparando-los con los quasi 2000 que heba dito Barrena que perderían o treballo en unas declaracions d’antismas, en un episodio que remeró a lo d’Andrea Fabra en o Congreso Espanyol d’os Diputaus. Tamién bi habió polemica quan fació referencia a la represión contra os manifestants u quan acusó a lo gubierno de xenofobia por a politica sanitaria, lo que fació que s’acuitasen mormors entre a bancada d’o PP, todas dos qüestions que Rudi negó fendo referencia a la manifestación educativa d’o pasau lunes en o Paraninfo y asegurando que dengún no se quedaba difuera d’a sanidat publica.

De man d’o PAR y o PP no bi habió guaires sorpresas. Os dos partius que refirman lo gubierno esfendioron as midas presas y o realismo en a situación economica que ye vivindo lo país, l’estau y o mundo. O PP se reafirmó en “as politicas d’austeridat y luita contra o deficit” y en “l’apuesta por a Espanya constitucional”.”Son tiempos de chestión real y responsable, no de demagochia”, dició Antonio Torres, portavoz d’a colla parlamentaria popular.

O PAR fació de vez de gubierno y oposición, esfendendo d’una man, que “s’heba feito lo correcto en prous qüestions”, pero fendo distancias con o PP. Alfredo Boné, o suyo portavoz, se sumó a la demanda d’un plan d’emplego y, a tamás de refirmar o gubierno de Rudi, dició que o suyo partiu “no renunciaría lo suyo aragonesismo y a lo suyo centrismo” remerando que han fixau posición propia, diferent a la d’o PP en 70 ocasions. Tamién dició que refirmaban qüestions que no les feban goi “por sentiu d’a responsabilidat”. A presidenta respondió clamando a Boné a que “quan tenese bella queixa, s’endreza-se ta ella porque ye a resposable de totz os consellers”, en referencia a Arturo Aliaga, conseller de Industria y secretario cheneral d’o PAR.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.