Rematan os treballos d’amilloras en a ilesia de Santa María Madalena de Tarazona

O templo ye catalogau dende 2004 como bien d'intrés cultural

Torre d'a ilesia (Foto: Wikipedia)

Torre d’a ilesia (Foto: Wikipedia)

Dimpués d’estar-se dos meses zarrada ta fer as obras d’acondicionamiento, a ilesia de Santa María Madalena de Tarazona ha tornau a ubrir as suyas puertas con una presentación publica d’as obras suyas. Unas obras d’amillora que no yeran previstas ta ista anyada, pero que ha caliu fer-las por o penible estau de l’interior d’a ilesia. Dende a Fundación Tarazona Monumental han confirmau que han caliu 30.000 euros ta uns treballos que permitirán amillorar o templo más antigo de Tarazona.

Treballos que prencipioron o pasau mes de marzo dimpués d’a demanda formal d’un informe ta valurar as actuacions concretas que caleban. Os debanditos treballos se centroron en pintar una atra vegada a ilesia y esviellar parti d’as luces y d’o sulero. As obras prencipioron en chulio y os resultaus suyos pueden viyer-se agora por os ciudadans de Tarazona y por qualsiquier turista que iplegue.

Chusto a valor turistica d’a ilesia estió una atra d’as razons ta actuar a escape. Considerada como una pieza alazetal d’o patrimonio historico de Tarazona, todas as partis embrecadas entendioron que caleba treballar-ie ta que o recinta fe-se buena farcha. De feito, os responsables de Tarazona Monumental consideran que, gracias a los treballos feitos, s’ha enamplau l’atractivo d’a ilesia y “ha premitiu recuperar parti d’o suyo estau primitivo y orichinal”.

Pero as obras feitas en 2012 no han estau una novedat en un templo feito a los treballos de restauración. Ya en 1963, a intancias d’a Dirección Cheneral d’Arquitectura, se suprimió a vuelta d’a nau de l’Evanchelio apareixendo lo teito de fusta con a decoración heraldica pintada en as suyas fileras. Antimás, se sacaron os adhibius supermesos a l’abside y o revoque d’os pilars, deixando visteros os sillars.

En ixa anyada, tamién se fació a sustitución d’o primitivo capitel de plomo d’a torre por un telladet de quatre vesants, una actuación estió represa en octobre de 2004 por o gubierno d’Aragón qui, a instancias d’a Comisión de Patrimonio, fació a recuperación orichinal de l’anyada 1610, fendo servir a mesma mena de ladrillo y a mesma chunta. Obras que favoreixioron a catalogación d’a ilesia de Santa María Madalena como Bien d’Intrés Cultural en a categoría de monumentos.

Fuent: http://www.aragon2.com/n-20211-705-Finalizan_trabajos_mejora_iglesia_Santa_Maria_Magdalena_Tarazona

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.