Reprenen en Qatar as negociacions sobre l’orache

A 18ena conferencia d'a ONU sobre o cambio de l'orache se fa en o país que fa más gases contaminants por habitador.

Protesta ecolochista en Copenhage (Foto: Labyrinthoflife)

Protesta ecolochista en Copenhage (Foto: Labyrinthoflife)

Delegacions de 195 paises s’achuntan dende hue en Doha (Qatar) en a Conferencia d’as Partis d’a Convención d’a ONU sobre o Cambio de l’Orache (COP 18) con a ideya d’accelerar as iniciativas ta achiquir a ran mundial os gases d’efecto hibernader, causant d’o calentar-se d’a Tierra.

Mientres quince diyas representants gubernamentals, d’a industria d’organizacions ambientals y d’institutos d’investigación pleitiarán sobre o cambio de l’orache en o país que más gases contaminants por habitador fa.

T’a responsable d’o cambio de l’orache d’a ONU, Christiana Figueres, o congreso de Doha ye tant important com os atros que s’han feito sobre a materias, y alavez aspera que’n surtan proposas sobre politica de emisión de gases d’os paises que i participan. “Os gubiernos han alcordau que caleba remanir por debaixo d’os dos graus de creiximiento d’a temperatura meya mundial ta empachar os piors impactos d’o cambio de l’orache. Pero sabemos que ixo no se puet conseguir sin una transformación dramatica d’a producción d’enerchía y de l’emplego que se’n fa”.

Tamién creye que os gubiernos en saldrán con una planifiación de calendatas ta cumplir l’alcuerdo que estableix prener un plan común en 2015, que ha de dentrar en vigor en 2020. En o trestallo economico, a previsión d’os paises ye de disposar de bells 100.000 millons de dolars ta poder tirar enta debant iste programa.  “Una respuesta más rapeda a lo cambio de l’orache cal y ye posible, tanto en terminos de politica internacional como en o d’ixamplar as accions a ran de politica nacional. En Doha cal asegurar que a respuesta s’accelere”, ha dito Figueres.

Antimás d’os obchetivos ditos por Figueres, en a Conferencia de l’Orache d’a ONU tamién se i debatirán os alcuerdos presos en congresos anteriors, como o Plan d’Acción de Bali (que esfiende a tecnolochía ta achiquir l’impacto d’os gases) u prochectos como a creyación d’infraestructuras sostenibles.

Qatar, qui más fan gases d’efecto hibernader

Dende fa una decara, Qatar tien o record de fer CO2 por habitador: 44 toneladas seguntes os datos d’a ONU de 2009, más de tres vegadas a cifra d’os EE.UU. (17 toneladas) y ueito más que no a de China (6 toneladas).

Doha ha sinyau o protocolo de Kyoto, que amuga as emisions de gases d’efecto hibernader, pero como yera un país en proceso de desembolique en l’inte d’a ratificación no se l’imposó garra obchetivo d’achiquir emisions.

 

Fuent: http://www.vilaweb.cat/noticia/4058603/20121126/reprenen-catar-negociacions-clima.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.