Representants d’a Semana Cultural d’a Madalena compareixen en o Concello de Zaragoza

Respuesta a las críticas de PP, PSOE y Ciudadanos

Representants d’a Semana Cultural d’a Madalena compareixen en o Concello de Zaragoza

Respuesta a las criticas de PP, PSOE y Ciudadans

Diferents portavoces de l’Asambleya d’a Semana Cultural d’a Madalena (SCM) participoron ahiere, 1 de chulio de 2016, en o pleno d’o Concello de Zaragoza ta exposar o suyo punto de vista sobre a moción presentada por o PP a cuenta d’o cartel d’o Guillotina Fest por “enzurizar a l’odeo”. En dita moción se pediba a retirada d’os 2000 euros atorgaus a la SCM en os presuposaus participativos aprebaus con o voto directo d’os vecins a o prochecto d’a SCM entre atros.

A moción salió abance con os votos a favor d’o PP y C’s y a abstención d’o PSOE y a oposición de Zaragoza en Común y a Chunta Aragonesista. A representación d’a SCM abandonó la sala antes d’a votación formal o que achacó a o “absurdo debat politico”. Pero agradeixió a las diferents asociacions d’o vico o haber-les “permitiu tener voz ta exposar os nuestros argumentos racionals frent a os absurdos motivos d’o PP”.

En o pleno participoron portavoces de l’Asambleya d’a Semana Cultural, d’o Madalena Street Market, d’a Comisión Infantil, d’a Comunidat de Canonesas y laicos, d’a Casa de Choventut d’o Casco Viello y d’o Guillotina Fest. Contino se replegan os suyos as suyas intervencions.

PORTAVOZ DE L’ASAMBLEYA D’A SEMANA CULTURAL D’A MADALENA

“Agradeixemos a l’Asociación Vecinal d’a Madalena a oportunidat de permitir-nos exposar o nuestro punto de vista sobre a moción presentada.

A mía intervención tendrá un tono amable, en connexión con o esprito ludico y divertiu d’as nuestras fiestas, y en distancia explicita d’o tono de la disputa electoral y partidista. Disputa en el qual nos hemos visto incluius forzadamente. Totz os aquí presents compartirán que a nuestra presencia hue en iste pleno ye, en exclusiva, conseqüencia d’o pasau contexto electoral y d’o pinpanpún partidista. Centremo-nos.

Cal aclarir que l’Asambleya d’a SCM la componen decenas d’entidatz, comercios, asociacions y vecins d’a zona. l’Asociación Vecinal d’a Madalena ye solament una pieza mas d’ixe puzle amplio, diverso y heterochenio, que ha veniu actuando dende fa anyos como paraguas formal y churidico en a solicitut de permisos u aduyas. Ye inchusto tractar de reducir a nuestra realidat plural y a nuestra forma d’organización a traviés d’una asambleya barrial ubierta y publica, que por a suya propia naturaleza impide etiquetarla u clasificar-la. Ye inacceptable encasillarnos en a radicalidad, o nuestro programa d’actos responde por ell mesmo, asinas como os intervinientes que me seguirán y que charrarán dende a suya propia perspectiva como breu muestra d’o que realment somos. No representamos a tot o nuestro vico, pero si a una realidat muit significativa d’iste y d’a nuestra ciudat.

Hemos de sinyalar a trascendencia y proyección d’unas fiestas de vico solas por a suya forma de chestión participada, por as mas de 100 actividatz programadas (o Guillotina Fest ye solament una d’ellas), por as suyas 70 entidatz colaboraderas y por l’autofinanciación d’o 95% d’o suyo presuposau. 15.000 personas asistioron a o suyo acto central, a Foguera de San Juan en o parque Bruil, un escayecimiento que ubrió os telediarios autonomicos u a portiada d’o Heraldo d’o pasau viernes. Un fiestón que os retz socials destacoron por o estau impoluto en el qual quedó o parque y por l’extraordinario comportamiento civico, una d’as nuestras senyas d’identidat.

A Foguera de Sant Chuan ye un colofón ilustrativo d’un programa aclamau y reconoixiu por a ciudadanía y por os meyos. Acabamos de finalizar a vigesimonovena edición d’as fiestas con mas trayectoria d’o Casco Historico Zaragozano. Iste anyo han ganau peso a Comisión Infantil integrada por as AMPAS de totz os colechios publicos d’a zona u o Madalena Street Market con 125 chicotz comercios y artesanos como expositores.

Fa 18 anyos l’alavez president d’a Chunta de Distrito CH, Pedro Jato, hue asesor d’o Grupo Municipal d’o PP y portavoz en o nuestro *distrito, reconoixió a importancia d’a SCM aprebando una aduya directa que hemos veniu recibindo dica l’anyo pasau y que nunca pasó d’1.400 euros.

Respectiu a o conteniu d’a moción cabidaremos extender-nos en o que todas as personas aquí presents saben de sobras: que o cartel sinyalau se mueve indubdablement en o terreno d’a satira y a critica social y politica. Punto. No deseyamos rebaixar o ran intelectual d’iste pleno municipal dentrando a debatir os extremistas y dica simpaticos argumentos d’a moción d’o PP. Totz sabemos que a incitación a l’odeo y a la violencia ye un delito tipificau por o Codigo Penal. Y totz sabremos reconoixer o detalle somardón en acusar-nos d’aludir a la pena de muerte como ferramienta lechitima t’a aniquilación d’o adversario politico. Que jolgorio.

Me dirichiré a la resta de grupos politicos. A el qual han de votar a moción. Sían conscients que transitar a periglosa senda marcada reiteradament por o PP puede tener unas conseqüencias dramaticas. Tractar de censurar u creyar tribunals inquisitorials que delimiten as lechitimas formas d’expresión d’a ciudadanía da muito espanto. No sigan o suyo chugo. Reflexionen: acaso hemos de prohibir las fallas, os carnavales, as chirigotas, as viñetas d’os periodicos u a revista o Chueves. As fiestas populars son vehíclos ta expresar critica politica y social.

No somos aquí ta preservar una subvención de 2.000 euros, pero sí ta esfender o resultau d’uns presuposaus participativos an a ciudadanía ha quiesto reconoixer a nuestra trayectoria. Qué practica democratica invalida ixa votación y o deseyo d’ixes votantes.

Venimos hue aquí a que nos conoixcan y a exichir que no se instrumentalice a la sociedat civil ta dirimir as suyas miserias partidistas. Venimos hue aquí a certificar que no será iste pleno quí decida o conteniu d’a nuestra SCM.

Por zaguer, y por aprofitar minimament ista perda de tiempo, venimos hue aquí a reiterar a sola reivindicación colectiva esfendida por a nuestra Asambleya en a edición d’iste anyo: sinyalar a progresiva desaparición d’os bancos (os de posar-se) y a inacción d’este equipo de gubierno en o suyo reposición. Son nuestros desapareixius bancos una alegoría d’a eterna tensión entre a tendencia a convertir as carreras en vials y os vicos en residencias aisladas, y entre qui pensamos as carreras y as plazas como espacios con a función prencipal de propiciar a trobada y o intercambio cultural entre as personas, an surtan y se resueltan os conflictos. Devolvednos os nuestros bancos”.

PORTAVOZ D’A ORGANIZACIÓN D’O GUILLOTINA FEST

“Quiero agradeixer a l’Asociación cultural y recreativa Vico Verde por posibilitar que o Guillotina Fest tienga voz en iste pleno.

En primer puesto remarcar que o Guillotina Fest ye un d’os cientos d’actos que i hai en a Semana cultural d’a Madalena, criminalizar a ista sería como culpar a os JJOO de dopache quan amaneixe un caso particular.

O cartel d’o Guillotina Fest, ha estau un cartel que tant solament se puede catalogar dentro d’a sátira politica. Podemos entender perfectament que no faiga goyo, que i haiga a chent a el qual pueda ferir a suya sensibilidat, y que les resulte polemico, pero este ye o terreno en el qual se mueve a sátira politica.
En quantos países europeus se fan exposicions sobre a sátira an se pueden veyer a chefes de gubierno espullaus, a Sarkozy guillotinau a o profeta Mahoma en a portiada de Charlie Hebdo.

Vustés saben que iste cartel no ye un delito, si no l’hesen denunciau ya, saben que qualsiquier causa chudicial con iste proposito se quedaría en brenca, como ha contrimostrau os populars casos d’os Titiriteros u o Chueves. Alavez si no ye un delito, de qué somos charrando. De gustos Je suis Charlie Hebdo.

O Tribunal Europeu de Dreitos Humans en a suya sentencia d’o 25 de chinero de 2007 sinyala: que os politicos, vustés, han de #suportar as criticas y que a sátira ye destinada precisament a provocar y a sobater.

A Wikipedia define asinas a satira Politica: a satira politica se distingue normalment de la protesta politica u a disensión politica, pus no implica cheneralment una intención amagada ni busca influir en o proceso politico. Ocasionalment puede fer-lo, pero lo normal ye que simplament busque entretener y provocar. Entretener y provocar.

A satira puede rastriar a lo largo d’a historia; allí an ha existiu un gubierno organizau, i hai habiu satira politica.

Este ye un cartel que dica un nino identificaría con a satira y a humor. No bi ha sangre, no bi ha cenyos de dolor, qualsiquier grupo violento que de verdat querese animar a la chent a eliminar fisicamente a as suyas adversarios politicos, u a l’odeo, refusaría iste cartel por pareixer una chanza pueril.

Y vustés lo saben bien, no les descubro brenca que dimpués d’a suya frontera no saban. Utilizan isto ta debilitar a l’equipo de gubierno actual. No nos incumban en os suyos afers baixos. No tienen dreito. Nusatros hemos guillotinau graciosament a las representacions maximas d’os diners, politica y ilesia, hemos feito 40 copias d’un cartel y un evento en o Facebook con 27 me fas goyo. Una difusión pauperrima. Vustés son os que han difundiu o nuestro cartel y os que han creyau un problema an no lo i heba.

Ye muit perigloso tomar a senda d’o control d’iste tipo de cosetas, as sensibilidatz, respectos y emocions son un terreno fanganoso, antes u dimpués se tornará en o suyo contra, en a de todas y totz.

Nusatros somos chent autogestionada y creativa que venimos d’o Punk. Mentes mas brillants y maquiavelicas que as suyas han intentau amortar ixa flama, no saben o que fan. O proximo anyo tornaremos a la carga, o proximo Guillotina Fest tendrá as cabezas de Pablo Iglesias, Alberto Garzón, Inés Arrimadas y si siguen sin devolver-nos os nuestros bancos, tendremos a cabeza de Pedro Santiesteve y d’Alberto Cubero y tamién a mía. Talment cambiemos a guillotina por a siella electrica u ta dar-le un aire mas nacional por o garrote Vil.

Son totz convidaus a venir. Vengan, que #le lo pasarán bien. Nos veyemos o proximo anyo.”

PORTAVOZ D’A ORGANIZACIÓN D’O MADALENA STREET MARKET

“En primer puesto agradeixer a l’Asociación de Vecins Lanuza Casco Viello a posibilidat que me dan ta poder intervenir en o Pleno de hue. No perteneixco a dita asociación y viengo en representación d’o Madalena Street Market, o qual no ye rechistrau en o censo d’entidatz.

O Madalena Street Market naixe dentro d’a programación d’a Semana Cultural d’a Madalena con un obchectivo claro d’esfensa y visibilización d’o chicot comercio. Ta aportar o nuestro chicot granito d’arena a la supervivencia d’o comercio de cercanía, ixe que construye vico, o de l’artesanía, o d’as personas creativas y o d’os productos de kilometro zero- frent a o consumo despersonalizau en as grans superficies, qualques comerciantes y vecinas d’o vico decidimos treballar colectivament con l’Asociación vecinal y incluir iste evento dentro d’as actividatz d’a semana. a suya organización ye basada clarament y dende o prencipio en a autogestión.

En a primera edición aconseguimos quitar a la carrera 50 prochectos de el qual luitan cada día contra aire y marea por mantener vivos en ista chungla plena de centros comercials y hipermercaus.

Dende alavez a participación ha iu en aumento dica plegar a 130 expositores iste 25 de chunio.

Dende o nuestro punto de vista, con ista moción se saca lechitimidat a la participación ciudadana- a las personas que a traviés d’o suyo voto en os presuposaus participativos heban decidiu án destinar diners publicos- y, en zaguera instancia, se penaliza -mesmo criminaliza- a qui fan d’os vicos d’ista ciudat espacios de convivencia vivos y singulars”.

PORTAVOZ D’A COMISIÓN INFANTIL

“A Comisión Infantil d’a Semana Cultural d’a Madalena ye formada as AMPAS d’os tres colechios publicos d’a zona (Tenerías, Gascón y Marín, y Candido Domingo), asinas como l’Asociación Nogará, l’Asociación Gusantina y o CTL Esbarizaculos.

En ista edición hemos preparau 14 actividatz infantils, destacando l’alta participación y a convivencia chenerada. Nos sorprende haber de venir a iste pleno a explicar que ye a sátira, porque dica nuestros peques l’entienden. Os nuestros ninos y ninas han visto os titeres de cachiporra y dengún interpreta que les somos enzurizando a la violencia u a apegar entre ells y ellas.”

PORTAVOZ D’A COMUNIDAT DE CANONESAS Y LAICOS

“Agradeixemos a l’Asociación Vecinal Parque Bruil-Santo Agustín por permitir-nos tomar a parola y intervenir en iste pleno.

Represiento a la comunidat de canonesas y laicos vinculaus d’o Monesterio d’a Resurrección.
Como vecins d’o vico d’a Magdalena, venimos participando dende fa quantos anyos en a Semana Cultural, ofrimos cheneralment una visita a o monesterio, y procuramos que a visita, cada anyo sía dende una perspectiva diferent.

Somos una mas d’as muitas actividatz que s’organizan en dita Semana, dende o mas variau orichen d’Asociacions, colectivos etc. etc. Y an Guillotina Fest ye una mas, y ista actividat no represienta, a todas as de demás.

No se tracta de si me fa goyo u no o cartel d’a polemica en qüestión. Ye un cartel satirico, y encara que a satira no ye o nuestro luengache, cal respectar-lo, pus ye un luengache legalment protechiu como forma libre d’expresión.

En zaguera instancia si calese chudgar-lo, l’habría de fer un tribunal.

Nos fería goyo que tiengan en cuenta que a Semana Cultural, cada anyo ye mas diversa y participativa, y iste festival, con o suyo cartel, no represienta a la totalidat d’a Semana Cultural, que
por cierto, tiene o suyo propio cartel”.

PORTAVOZ D’A CASA DE CHOVENTUT CASCO VIELLO

“Agradeixco a l’Asociación de Vecinos Parque Bruil-Santo Agustín a posibilidat de dirichir-me/dirichir’me a vustés, pus d’unatra forma no sería posible fer-lo.

Ista mesma situación ye a que se planteya en a Semana Cultural d’a Madalena, que ameneste d’una entidat ta poder levar a cabo as chestions, quan en realidat la levamos a cabo una pluralidat d’elementos, por clamar-nos de bella forma a: comercios, tabiernas, asociacions, agrupacions, recursos, AMPAS, centros de tiempo libre, etc.

A Casa de Choventut leva bastants anyos participando y organizando a Semana Cultural, y nos pareixe poco correcto que se nos considere incitadores d’a violencia y l’odeo quan o nuestro treballo diario ye precisament o contrario. Al sancionar a la Semana Cultural, se nos ye definindo a totz os participantes con ixa etiqueta, quan precisament ye a pacifica convivencia d’os organizadores, ubierta a tot o que quiera participar, la qual cosa fa tant exitosa a suya existencia.

Un cartel viene a meter en qüestión tot isto, y manimenos, ni sisquiera ye o cartel d’a XXIX Semana Cultural d’a Madalena, que sí estió votau y aprebau en asambleya y por el qual sí podríanos estar sancionaus. O decalogo de normas d’iste anyo replegaba o caracter altruista, transfeminista, y reivindicativo, a voluntat d’integrar a os distintos grupos y colectivos d’o vico, a prioridat d’as actividatz comunas (como o cross nocturno u o Street market) frent a las actividatz particulars, a obridura a las distintas zonas d’o vico sin saturar determinaus espacios, o suyo caracter vechetariano y aragonesista. Tot isto ye politica, pero brenca d’ixo implica una invitación a l’odeo y a violencia. a mía simpla presencia en iste espacio y as mías parolas son tamién un acto politico, les aseguro que muit a o mío pesar. De traza que si lo foi ye tamién por as conseqüencias, pro que no economicas sino eticas, que habremos d’asumir, totz!, en o momento en que a Semana Cultural sía sancionada”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.