Representants d’Universidat albandonan o claustro d’a Universidat de Zaragoza

Os representants estudiantils d'o sindicato universitario Universidat albandonan simbolicament o claustro d'a Universidat de Zaragoza en protesta por o "paripé" que seguntes ells ye o Consello de Gubierno d'ista institución

Foto: AraInfo

O sindicato independentista y revolucionario Universidat denuncia a “farsa” que suposa o Consello de Gubierno d’a Universidat de Zaragoza, “un supuesto organo colechiau de gubierno d’a Universidat de Zaragoza que ye en realidat un simple ‘paripé’ que a suya función real consiste en lechitimar as decisions presas por grupos de profesors y l’equipo rector y en o qual as estudiants no i tienen garra peso efectivo“.

“Faiga d’eixemplo o feito de que en ell i hai un total de 6 estudiants, 3 PAS, 11 miembros de l’equipo rector y os 20 profesors que suman os representants d’o Claustro y os directors de centros y departamentos, amás d’os representants d’institucions politicas y interpresarials y de l’equipo rector, y ta incluyir bella cosa en l’orden d’o día d’as suyas reunions no ye prou nian con os votos de totz os estudiants unius, o que amuestra o suyo claro aspecto antidemocratico”, han explicau.

Por ixo as cinco militants d’Universidat miembros d’o claustro s’han devantau d’os suyos posientos y han albandonau a sala en protesta por ista “farsa antidemocratica” en o momento d’a triga de representants en o Consello de Gubierno d’a Universidat d’os diferents estamentos d’o claustro (Estudiants, PDI, y PAS).

“Se preba d’amostrar a Universidat como un puesto d’integración de pluralidatz y d’eixemplo democratico, pero lo cierto ye que a irrelevancia d’a representación estudiantil ha chenerau una desafección con a participación de tot chustificada“, explica un miembro d’Univerdiat, que adhibe, “a estudiantalla tien esclatero que participar en o consello no tien garra trascendencia dillá de perpetuar un sistema de burocracias y d’intreses infrapoliticos”.

As representants d’o colectivo tornarán a la sala ta presentar as suyas mocions y intervencions por o dreito a la vada d’a estudiantalla, por a millora d’o transporte universitario Uesca-Zaragoza, por o trilingüismo en a Universidat y exichindo a trencadura de relacions entre a Universidat y l’Estau d’Israel, a fin d’os convenios con bancos y entidatz financieras y l’adaptación ta l’acceso con silla de ruedas d’os edificios d’a Universidat.

Lo fan sabendo que no ferá guaire honra, pero consideran que no cal desaprofitar garra frent de luita en o que puedan participar-ie.

Fuent: http://arainfo.org/2012/12/los-representantes-de-universidat-abandonan-el-claustro-de-la-universdidad-de-zaragoza/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.