Rescatar a soberanía

Gonzalo González

Ya sabemos o pre d’a primera factura d’a crisi: 7.550 millons d’euros. O Banco d’Espanya plega de fer publicos os datos d’o clamau rescate d’as caixas d’estalbio vía FROB. Rescate, nacionalización u crisi son eufemismos ta privar a parola estafa. Un gran forau creyau por a especulación y una chestión suicida d’interpresas privadas que agora somos bosando os ciudadans d’a nuestra pocha. Dengún va a estar chudgau por semellant desfalco, total impunidat t’os executivos d’o sector financiero. Y ta estar conscients d’as dimensions d’a estafa cal saber que con os ingresos  d’a conchelación d’as pensions (1500 millons) y o retalle d’os chornals d’os funcionarios (1400 millons) solament da ta bosar, vía FROB, o rescate d’una d’as caixas, a CAM. Bella cosa menos d’a meitat d’o total, a resta d’a factura la bosaremos relichiosament entre muitos anyos vía retalles socials, amás d’atros gastos esdevenius d’a financiación d’a deuda.

Entremistanto, Durao Barroso, president d’a Comisión Europea, ha proposau con a boca chicota creyar una taixa d’o 0.01% que bosen as institucions financieras por as operacions mas especulativas. Frent a ixe 0.01%, l’esfuerzo fiscal d’un ciudadano vía IRPF seguntes Eurostat ye d’o 35%. Os estaus miembros han dau aduya y guarancias de 4,6 billons d’euros a o sector financiero, pero manimenos tot, os bancos se pronuncian en contra d’a nueva taixa.

Os datos economicos amagan as conseqüencias politicas, a incapacidat de gubernar d’o Estau ligau por o peso d’a deuda, amás d’o empobrimiento global d’a sociedat. Tot o nuestro sistema politico se basa en a premisa d’a sobiranía popular. Ya saben, a sobiranía “reside en el lugar del que emanan los poderes del Estado“. Una entelequia. Fa quatro días a pieza base de l’ordenamiento churidico espanyol, a constitución, estió modificada urchentment por a presión d’os mercaus. Por si quedaba beluna dubda sobre án reside a sobiranía. Astí ye la clave de qualsiquier cambeo politico que readugue a situación actual: recuperar a sobiranía.

Entre que a capacidat d’os ciudadans siga secuestrada por as entidatz financieras qualsiquier intento de cambeo politico ye condenau a o fracaso. As institucions seguirán funcionando a o dictau d’os mercaus. En l’estau espanyol a sobiranía popular ya estió secuestrada entre 40 anyos y s’aconsiguió recuperar-la. Agora toca tornar-lo a fer.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.