Respuesta clara en Zaragoza en contra d’o faixismo

400 personas se concentran en Zaragoza un diya dimpués d'as agresions faixistas en una charrada en a Facultat d'Economicas d'a Universidat de Zaragoza

Foto: Pablo Ibáñez (Arainfo)

Ahiere se dio una respuesta contundent en o Paraninfo d’a Universidat de Zaragoza a las agresions faixistas ocurridas en a charrada “O nuevo tiempo politico en Euskal Herria”, organizada por a Coordinadora t’o Dialogo y a Negociación d’Aragón o pasau chueves en a Facultat d’Economicas de dita universidat. Unas 400 personas se i concentroron reclamando a fin d’as agresions faixistas y a suya impunidat. A concentración se convocó poco dimpués d’as agresions, o que no ha empachau a gran afluencia de chent y o refirme de diversas organizacions socials y politicas como CJC, Purna, UJCE, Clase Contra Clase, PCPE, Izquierda Anticapitalista Aragón, Coordinadera Antifaixista de Zaragoza, PCA-PCE, No Pasarán, SOA, CGT, CNT, Bloque Independentista de Cuchas, Puyalón, A Clau Roya, A Enrestida, IU, CHA, EQUO u o Colectivo Pedalea.

S’han cantau consignas en contra d’os nazis y qui les refirman, y s’ha desplegau una pancarta en a que se leyeba “Prou d’agresions faixistas y racistas”. A la fin d’a convocatoria s’ha leyiu un comunicau en que s’exiche a dimisión d’o delegau d’o gubierno espanyol “por a suya irresponsabilidat en os feitos ocurrius en a facultat”, denunciando a penible actuación d’a Policía Nacional espanyola, asinas como a dimisión d’o rector por reblar debant d’os faixistas, y denunciando tamién “a complicidat por parte d’as Institucions y d’as Fuerzas de Seguridat que no fan cosa ta empachar l’auche d’istas clicas d’extrema dreita”. Asinas mesmo, s’exichiba en o comunicau “a disolución de l’AVT y similars por enzurizar os animos y provocar un conflicto quan no n’i heba, y que as suyas intencions responden nomás a qüestions politicas y actitutz faixistas, podendo haber causau conseqüencias trachicas” y “a identificación y detención d’os agresors”.

De maitins, en o campus universitaire de Teruel, bells estudiants han transmitiu a la vicerrectora d’o campus, Alexia Sánchez, a suya decepción con l’actuación d’o rector por suspender a charrada debant d’as presions neonazis y demandan que se celebre a charrada en a Universidat, asinas como a identificación d’estudiants en os feitos y a suya expulsión d’a Universidat de Zaragoza. A vicerrectora transmitirá a o rector istas exichencias asinas como amostró a suya disposición a dialogar.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.