Ret mobil indichena 1 – Multinacionals 0

Un municipio mexicano s'ha feito en o primero de tot o país con o suyo propio sistema de comunicación mobil celular. Quí amenista una multinacional?

Talea de Castro. Foto: http://yorokobu.es

Talea de Castro. Foto: http://yorokobu.es

Habitar en Mexico implica un modus vivendi muit distinto en función d’o puesto d’o país an que un radique. No le faltan servicios, internet, transporte, locals de toda mena y qualsiquier comodidat a qui dispierta cada día, por eixemplo, en o Distrito Federal, Puebla, Guadalajara, Xalapa u Monterrey. Pa politicos y interpresarios, ixas metropolis significan gustosos bocaus economicos a on en vale a pena invertir. Pa qué caminar perdendo tiempo y billetz en ixos atros lugars d’o estau que no dan remanent?

Ocurre que 20.000 chicotas comunidatz (9 millons d’habitants) d’a mesma nación  nian disposan d’un repetidor de telefonía mobil que les permita de fer uso d’un celular. Abandonaus en a inanición comunicativa, son condenaus a charrar por telefonos fixos y pagar trucadas, a vegadas a l’extranchero, que os suyos pres dificilment pueden asumir. Talea de Castro (Oaxaca) ye una d’ellas. “Dende 2008 venimos solicitando un ret, pero garra companyía, ni Telcel, ni Entel, ni Movistar no querió ufrir-nos-ne nunca una porque no les ye rentable. Tampoco nunca o gubierno no nos ha quiesto subvencionar iste gasto”, explica Alejandro López Canseco, secretaire d’o sindico municipal d’ista chicota comunidat serrana indichena.

Conta l’edil que una d’ixas companyías -a unica que respondió a la suya solicitut-, les pediba una guarancia minima de 10.000 usuarios, una condición ridicla parando cuenta que a suya circumscripción ye habitada por 2.500 labradors sin capacidat conoixida de desdoblamiento. Tamién que dende os telefonos fixos que poseyen, una trucada a Estaus Unius -a on muitos d’os vecins tienen familia- tien un coste de 15 pesos por minuto (uns 2 euros). “Y ixo ye muito quan qui mas cobra aquí no quita mas de 500 pesos mensuals”, apostilla o portavoz municipal.

O de Talea, como o d’os atros 20 millars de comunidatz rurals mexicanas sin servicio mobil, pareixeba un caso perdiu referent a charrar dende un auricular sin cable. Pero iste lugarón ye habitau por ixa mena de chent que no accepta un “imposible” por respuesta. A cascar-la as interpresas, o gubierno, as suyas negativas y os pres astronomicos con os quals les quieren desangrar. “Nos fartamos d’asperar, asinas que hemos feito o nuestro propio ret de telefonía mobil”, explica López. Asinas ye. Iste municipio s’ha convertiu en o primer de tot Mexico con o suyo propio sistema de comunicación mobil celular. Quí amenista una multinacional?

“Tot empecipió a resultas d’una ideya que tenió una ONG (Rhizomatica), que heba veniu dica aquí a ubrir una emisora de radio”, relata o secretaire. “Sabeban o nuestro problema y nos proposoron una solución”. Ista organización, chunto a o grupo Redes por la Diversidad, Equidad y Sustentabilidad A. C., empecipioron en 2012 a realizar un prochecto pa instalar un ret privau de telefonía que cumpliría con todas as condicions tecnicas y legals que exiche a lei, habilitaría o servicio de telefonía mobil entre os habitants y reduciría considerablement os costes.

O sistema con o qual funciona iste ret autonomo consiste en a instalación d’una radio-base celular interna que opera en una banda de 900 MHz (a capacidat maxima que permite a lei pa no amenistar una concesión por ella), a la quala van a plegar os sinyals d’os celulars que se fan servir en o lugar. Ixos sinyals converchen en l’artefacto, o qual treslada a comunicación vía internet a traviés d’un protocolo VoIP.

Preboron y funcionó. Dimpués d’o primer asayo (en marzo), a chent d’o lugar no dubdó en ir a adquirir dispositivos. Rai si heban de recorrer os 113 kilometros que les desepara d’a capital d’o Estau (Oaxaca), u os 80 que n’i hai dica a primer población con servicios a la vista (Itxlan). En valeba a pena. No porque a telefonía mobil hese plegau en Talea. Sino porque la heban traida ells.

“Agora, por 15 pesos a o mes [o que vale un minuto de conferencia internacional por os suyos antigos telefonos fixos], as trucadas y os mensaches entre a chent d’o lugar son de raso gratuitas y ilimitadas. Y un minuto de conferencia con Estaus Unius, a 20 centimos de peso!”, quantifica a diferencia López. As trucadas nacionals difuera d’o lugarón serían mas caras, pero pa ixo encara tienen a linia antiga, que queda relegada “a ixa función nomás”.

– Ha cambiau l’ambient en o lugar?

– Holió si ha cambiau-, responde l’edil. -Agora ya i hai uns 700 celulars, quasi a metat d’os que somos. A chent los ha mercaus y se pueden trucar encara que no sían amán d’un telefono fixo. Beluns se la pasan charrando- diz con sorna. -Ye atra vida-.

A prestación d’un servicio pa ista comunidat indichena basau en a colaboración y os sistemas tradicionals de radio ha ubierto una nueva perspectiva pa totz ixos atros lugars mexicanos y extranchers que encara viven en o silencio comunicativo. “Unas ueito comunidatz ya s’han intresau por o nuestro nuevo sistema”, afirma López. Amás, Talea ya ha solicitau a COFETEL (Comisión Federal de Telecomunicacions) una concesión pa presentar-se como ‘cobaya’ experimental d’o nuevo sistema. Talment nunca antes no les haigan feito caso. “Pero agora isto funciona”, se fa a riseta o secretaire. Saben que les puede intresar.

Fuent: http://yorokobu.es/redmovilindigena/

Una rispuesta a Ret mobil indichena 1 – Multinacionals 0

  1. Pingback: Ret mobil indichena 1 – Multinacionals 0. Talea de Castro en Oaxaca s’ha feito con o suyo propio sistema de comunicación mobil comunitario | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.