Retalladas d’un 14% en l’amostranza publica y de menos de 2% en a privada

A consellera presentó ahiere os presupuestos d'Educación . Se retallan 100 millons d'euros respecto a l'anyada pasada

Dolores Serrat presentando o presupuesto (Foto: D.Ch.A.)

Dolores Serrat presentando o presupuesto (Foto: D.Ch.A.)

Os presupuestos d’Aragón ta estianyo contarán con 100 millons d’euros menos que no l’anyada pasada. Dolores Serrat, consellera de Educación, Cultura y Esporte presentó ahiere os presupuestos d’a suya consellería que plega a los 912 millons d’euros.

Seguntes informaba ahiere en a Comisión de Ficienda, Presupuestos y Administración Pubica, o gubierno destinará o 97,1% d’o presupuesto ta l’aria d’Educación. Serán 886 millons d’euros que’n pertocan 734 ta l’amostranza no universitaria y 151 t’a Universidat de Zaragoza.

En l’apartau de infraestructuras o gubierno destinará 16,6 millons de euros ta obras, un 17,6% más seguntes informan. Con ixos diners se construyirá o colechio Val d’Espartera 2 y l’aulario de Primaria de Ronda Norte en Zaragoza y s’ixamplará o colechio Foro Romano en Quart de la Uerva.

Tamién se presentó o presupuesto d’a resta de arias d’a consellería. Ta Patrimonio Cultural irán 12,7 millons d’euros, quasi a metat ta protección y espardidura. Se ferán actuacions en a torre d’a catedral de Teruel, o Seminario de Sant Carlos, o conchunto fortificua islamico de Calatayú u l’Aula Dei, entre atras. L’aria de Cultura tendrá 7 millons d’euros de presupuesto y a d’esporte 6 millons.

A consellera informó tamién de l’aplicación d’o plan de racionalización de gasto “que ha permitiu cabidar dica o 88% en atención protocolaria, reunions y viaches” y a on que “se continarán achiquindo gastos en inmuebles” y se ye treballando en “a centralización d’os servicios de telefonía d’o departamento y d’os centros educativos, asinas como en a centralización de compras de material ta escuelas y institutos”.

Más retalladas en a l’amostranza publica que en a privada

De man d’a oposición os presupuestos son estaus criticaus por as suyas retalladas. IU ha feito publico o suyo refús a que se retallase un 14% en o presupuesto ta Educación Primaria y Secundaria en centros publicos y nomás un 0,2% en Primaria y 1,7 en Secundaria en centros privaus concertaus. A consellera respondió que “un alumnos que esleixe asistir a un centro privau pero refirmau con fundos publicos costa a las arcas comuns la metat por lo que deseyó que bi hese más alumnalla en iste sistema y tener asinas más diners t’a publica”. CHA tamién ha criticau “l’apuesta por a concertada” feita por o Gubierno.

Cuanto a la plantilla de profesors, a retallada de 90 millons d’euros en gastos de personal, fa creyer a o PSOE que, u se forachitan interinos, u se baixa o chornal t’o profesorau. Tamién se preguntan porque se puya o chornal, encara que poco, a altos cargos. Dende CHA tamién se ha criticau os pocos presupuestos destinaus a las arias de Cultura y Esporte.

Una rispuesta a Retalladas d’un 14% en l’amostranza publica y de menos de 2% en a privada

  1. Pingback: Retalladas d’un 14% en l’amostranza publica y de menos de 2% en a privada | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.